Pesoál saúde fó vasina Pfizer ba estudante Eskola 30 agostu, iha resintu eskola, Comoro, kuarta (27/10). Imajen TATOLI/António Gonçalves

DILI, 27 outubru 2021 (TATOLI)— Ministra Saúde Odete Maria Freitas Belo, hateten, vasina Pfizer iha efikásia ho 95%   proteje labarik sira ho idade 12 to’o 17 hosi infesaun sintomátika SARS-CoV-2.

“Vasina Pfizer iha efikásia 95% kontra infesaun sintomátika SARS-CoV-2,” Ministra Odete, hateten, bainhira hala’o lansamentu ofisiál ba vasina Pfizer iha eskola 30 de Augostu,Comoro-Dili, kuarta ne’e.

Governu liuhosi Ministériu Saúde lansa ona vasina Pfizer doze dahuluk, hahú 27 outubru to’o novembru 19, hafoin 20 novembru tama ba doze daruak.

Notísia Relevante: Vasina Pfizer doze 100.620 hosi EUA to’o iha Dili

Tuir dadus Ministériu Saúde, iha ámbitu lansamentu doze dahuluk konsege vasina ona estudante hamutuk 1.000-resin, kompostu hosi  estudante 350 iha Eskola 4 de Setembru, 300 iha Nobel da Paz, 400 iha 30 Agostu, 53 iha Rekorrente Becora, 64 iha Sentru Salon no 84 iha Nú Laran.

MS mos define doze daruak hosi vasina ne’e sei administra ho intervalu loron 21.

“Vasina ne’e fó ho 0.3 ml kada doze no sona iha kabaas (intra-muscular) tanba atu  proteje labarik sira hosi moras todan, ospitalidade no mate kauza COVID-19 inklui prevene kontájia iha populasaun no  hamenus posiblidade ba variante foun atu mosu tan,” Governate ne’e afirma.

Estudante sira forma hela bainhira simu formulariu hodi priense antes atu simu imunisasi Vasina Pfizer iha eskola 30 agostu komoro Dili, kuarta 27/10/2021.Imajen Tatoli/António Gonçalves

Nune’e, Ministra Saúde Odete husu ba estudante no professor sira hotu, inklui inan-aman labarik sira atu partisipa kampaña vasinasaun hodi hamenus risku infesaun COVID-19 iha páis ne’e.

“Ita hotu hakarak fila ba normalidade hakarak halimar ho kolega no aprende iha eskola maka ha’u husu alunu sira presiza vasina,’’ Ministra Saúde apela.

Iha biban hanesan, Enkarregadu Negósiu Embaixada Estadu Unidu Amérika (EUA), Tom Daley, hateten, EUA iha kompromisu kontinua apoia Governu liuhosi hodi luta hasoru COVID-19 iha Timor-Leste.

“Ita sei hamutuk hodi hakat pandemia globál atu hahú halo rekuperasaun ekonómiku hodi harii fututu ida ne’ebé mak seguru no di’ak liután ba sidadaun hotu,’’ nia kompromete.

Mekanizmu COVAX liuhosi doasaun hosi Estadu Unidu Amérika (EUA) entrega ona vasina Pfizer doze 100.620 ba Governu Timor-Leste.

Tuir planu vasinasaun ne’e sei realiza iha eskola sira no ba alunu foin-sa’e 50.000-sira hosi 60 to’o 110 ano, hosi munisípiu pre selesionadu ne’ebé maka sei simu vasina ba dahuluk.

Entretantu, Timor-Leste rejista totál kazu konfirmadu pozitivu COVID-19  ba labarik tinan 18 mai kraik na’in-3.661 (19%)  no óbitu na’in-13 (11%).

Notísia Relevante: Estudante eskola neen iha munisípiu Dili hahú simu vasina Pfizer

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here