SEII fahe livru ba partisipante advokasia kona-ba violénsia kontra feti no lavarik-feto iha salaun Administrasaun Viqueque, kuarta (27/10). Imajen TATOLI/Vitorino Lopes da Costa

VIQUEQUE, 27 outubru 2021 (TATOLI)Ekipa Sekrataria Estadu Igualidade no Inkluzaun (SEII), iha kuarta ne’e, halo advokasi ba Autoridade Viqueque kona-ba prevesaun violénsia hasoru feto no labarik-feto.

Inisiativa ne’e hanesan programa spotlight iha área espesífiku prevensaun, servisu no dezenvolve dadus, kria formasaun, ne’ebé SEII halo parseria UN Women ho objetivu atu elimina violénsia kontra feto no labarik-feto.

“Enkontru ne’e hodi koordena di’ak liután atividade ne’ebé implementa iha munisípiu Viqueque,” Konsultór nasionál ba progrma spotlight, Abílio Barreto, hateten ba Agência TATOLI, iha salaun Administrasaun Viqueque, kuarta ne’e.

Programa spotlight implementa ona iha munisípiu tolu hanesan Bobonaro, Ermera no Viqueque, nune’e daudaun haree ba ninia progresu no dezafiu.

“Ita implementa besik tinan-ida ona, tanba ne’e ita atu haree filafali ninia progresu no dezafiu sira ne’ebé durante ne’e ita implementa ona, oinsá maka ita haree hamutuk ba planu kampaña ativizmu violénsia kontra feto no labarik feto,” nia akresenta.

Durante hala’o atividade, ekipa implementadór sira hasoru difikuldade iha komunikasaun no koordenasaun iha nível nasionál to’o munisípiu tolu.

“Ba oin, ita sei hadi’a mekanizmu komunikasaun atu atinje objetivu ne’ebé ita hakarak hodi halo prevensaun hosi forma ka atus violénsia hasoru feto no labarik feto sira,” Abílio Barreto tenik.

Iha fatin hanesan, Administradór munisípiu Viqueque, Januário Soares ‘Boly’, agradese ba ekipa SEII ne’ebé durante tinan-ida ona implementa programa spotlight iha Viqueque, nune’e bele koordena di’ak liután.

Atividade advokasia ne’e realiza durante loron-ida, ne’ebé hetan partisipasaun hosi diretór servisu munisipál no feto potensiál sira iha Viqueque.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here