Prezidente RAEOA, Arsénio Paixão Bano, tersa ne’e monitoriza perfurasaun sistema bee-moos iha suku Lela-Ufe. Imajen/mídia ZEEMS.

OÉ-CUSSE, 27 outubru 2021 (TATOLI) —  Projetu perfurasaun sistema bee-moos iha bairru Noa-Ana, suku Lela-Ufe, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA) atinje ona 90%.

“Ami ba halo fiskalizasaun ba perfurasaun Lela-Ufe, serbisu tomak atinje ona 90% entaun tuir tékniku sira katak depois finadu ne’e, ita bele halo ona inaugurasaun, hodi entrega ba komunidade sira iha Lela-Ufe atu uza ona,” Prezidente RAEOA), Arsénio Paixão Bano, informa ba Agência TATOLI, iha Oé-Cusse, kuarta ne’e.

Hosi progresu serbisu 90% ne’e falta de’it 10% hanesan falta uma ho medida metru 2×2, lutu, instalasaun liña eletrsidade no instalasaun torneira sira hamutuk unidade 23, maibé sasán kompletu ona, hein halo instalasaun.

“Tanba ne’e maka ita hamutuk ho lia-na’in hamutuk ho lideransa autoridade lokál sira atu halo serimónia rituál husu matak malirin tanba serbisu ne’e tama ona iha faze terminasaun dada bee ba komunidade,” nia fundamenta.

Xefe suku Lela-Ufe, José Neno Sila, agradese ba Autoridade RAEOA tanba planu prioridade setór água liuhosi perfurasaun sistema bee-moos nune’e bele fó moris ba populasaun iha Lela-Ufe hodi uza ba tempu naruk.

“Projetu perfurasaun ne’e sei benefísia populasaun iha bairru tolu iha aldeia Mahata, bairru Kuat-Enas, Nefolete no bairru Mahata ho totál populasaun hamutuk 1.074,” nia orgullu.

Entretantu, tuir dadus asesu hosi tékniku Diresaun Rejionál Infraestrutura, obra perfurasaun ne’e metro 60 ho kualidade débitu bee-moos litru 6.8.

Projetu konstrusaun perfurasaun sistema bee-moos ne’e ezekuta hosi empreza Am-Lhichoe Unipesoál, Lda, durasaun serbisu fulan-10, ho kontratu $494,727.59 mai hosi Orsamentu Jerál Estadu (OJE) 2021.

Notísia relevante: Uma kain 200-resin iha Nitibe husu Governu konstrui perfurasaun bee-moos


Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here