Prezidente Repúblika (PR), Francisco Guterres Lú Olo. Imajen Tatoli/Egas Cristóvão.

DILI, 27 outubru 2021 (TATOLI)—Prezidente Repúblika (PR), Francisco Guterres Lú Olo, kontinua apela ba sidadaun hotu atu simu vasina hodi hasa’e imunidade hodi proteje an no luta hodi kombate COVID-19.

Notísia Relevante: Populasaun Timor-Leste simu ona vasina kompletu 46%

“Kazu COVID-19 tun maibé la lakon. Tanba ne’e, hau apela nafatin ba sidadaun hotu atu simu vasina hodi bele proteje an hodi kontra no kombate moras COVID-19,” Prezidente Repúblika hateten ba jornalista sira iha edifísiu Prokuradória Jerál Repúblika (PGR, siglá portugés), Colmera, kuarta ne’e.

Xefe Esatdu husu ba sidadaun sira-ne’ebé seida’uk simu vasina atu hakbesik an ba sentru vasinasaun ka sentru saúde hodi simu vasina.

Iha Munisípiu Dili no Munisípiu baluun persentajen vasina boot liu ona, nune’e enkoraza sidadaun sira atu simu vasina, mezmu kazu infetadu iha Timor-Leste komesa tun maibé COVID-19 la’o hela no iha tan variante foun, entaun ema hotu presiza kuidadu an nafatin.

Tuir dadus hosi Governu, to’o iha loron 16 outubru tinan ne’e Governu Timor-Leste simu ona doze vasina milliaun 1,213 ho marka sira hanesan AstraZeneca ne’ebé doasaun hosi sistema COVAX no nasaun amigu Austrália, Japaun, Nova Zelándia, Portugál no vasina Sinovac doasaun hosi Xina.

Aleinde vasina Pfizer ho númeru 100,620 daudaun to’o ona Timor-Leste doasaun hosi Estadu Unidu Amerika, ne’ebé sei vasina labarik ho idade 12 to’o 17.

Tuir dadus hosi Sentru Integradu Jestaun Krize (CIGC, siglá portugés) hahú hosi 21 marsu 2020 to’o 26 outubru 2021, kazu konfirmadu komulativu 19.778, komulativu rekuperadu 19.605 no komulativu óbitu 121.

No populasaun elijível tinan 18 ba leten, ne’ebé simu ona vasina to’o 26 outubru 2021 tuir sistema informasaun saúde iha Ministéiru Saúde totál komulativu primeiru doze iha Dili (81,1%) no totál kumulativu segundu doze iha Dili (72,7%).

Enkuantu, ema ne’ebé simu ona vasina doze dahuluk iha Timor-Leste (71,5%) no simu ona doze daruak (46,5%).

Notísia Relevante: Governu komprometidu hasa’e númeru vasina atinje 80%

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here