Prezidente Repúblika, Francisco Guterres Lú Olo. Imajen TATOLI/António Gonçalves.

DILI, 27 outubru 2021 (TATOLI)—Prezidente Repúblika (PR), Francisco Guterres Lú Olo, hateten seidauk tempu atu re-kandidata an ba Prezidente Repúblika hodi kompete iha eleisaun prezidensiál 2022.

Notísia Relevante: Prezidente Repúblika sei dekreta kalendáriu eleisaun prezidensiál iha janeiru 2022

“Ha’u hateten tiha ona, seida’uk tempu para atu bele hateten re-kandidatu an ka lae,” Prezidente Repúblika, Francisco Guterres Lú Olo, hateten ba jornalista sira hafoin hala’o inaugurasaun ba edifísiu foun Gabinete Sentrál Kombate Korrupsaun, Prokuradória Jerál Repúblika (PGR, siglá portugés), iha Colmera, Dili, kuarta ne’e.

Atuál Prezidente Repúblika, Francisco Guterres Lú-Olo, simu pose sai Prezidente Repúblika iha loron 20 fulan maiu 2017 ho mandatu tinan lima (2017-2022), ne’ebé sei termina iha tinan oin.

Tuir Konstituisaun Repúblika Demokrátika Timor-Leste, artigu 75 (Elejibilidade) iha alínea 1 hateten, bele tuir kandidatura ba Prezidente Repúblika sidadaun Timoroan sira-ne’ebé, iha ilas hotu tuir mai ne’e;

  1. Sidadaun nanis,
  2. Iha tinan mínimu 35,
  3. Ho kapasidade di’ak,
  4. Ne’ebé hetan proposta hosi sidadaun hili-na’in mínimu nain rihun lima (5000).

Iha alinea 2 haktuir, Prezidente Repúblika kaer mandatu to’o tinan lima (5) nia laran no ninia knaar ramata bainhira Prezidente foun simu pose no iha aliena 3 hateten, Prezidente Repúblika nia mandatu bele hetan renovasaun dala-ida de’it.

Tuir lei bainhira Prezidente Repúblika fó sai ona kalendáriu eleisaun sura hosi loron ne’e dentru loron 20, komesa kandidatu sira aprezenta ona sira-nia kandidatura iha Tribunál Rekursu (TR) hodi halo autentikasaun.

Jornalista : Nelson de Sousa

Editór       :  Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here