Prezidente Repúblika, Francisco Guterres Lú Olo hamutuk ho Prokuradór Jerál Repúblika (PGR), Afonso Lopez, asina plaka hodi inagura edifisíu gabinete sentrál Prokuradór-Jerál Repúblika (PGR) ih Colmera, kuarta (27/10). Imajen Tatoli/Egas Cristóvão.

DILI, 27 outubru 2021 (TATOLI)—Prezidente Repúblika (PR), Fransciso Guterres Lú Olo, kuarta ne’e inaugura edifísiu foun Gabinete Sentrál Kombate Korrupsaun, Prokuradória Jerál Repúblika (PGR, siglá portugés) iha Colmera, Dili.

“Inagurasaun edifísiu ne’e ho espasu ba Ministéiru Públiku adekuadu mellora servisu sira,” Prezidente Repúblika, Francisco Guterres Lú-Olo hateten iha nia diskursu.

Xefe Estadu hateten, Ministéiru Públiku determina nia funsaun tuir konstituisaun iha artigu 132, defende interese Estadu nu’udar na’in ba asaun penál, legalidade demokrátika no defeza minoridade inkapaz, no kriasaun Gabinete Espesializada ba Gabinete Kombate Korrupsaun no Krime Organizadu tuir estatutu Minietériu Públiku nian.

Ministéiru Públiku iha esperiénsia tinan 20 ona mezmu hasoru dezafiu sira, maibé hatudu servisu mudansa signifikante iha tempu agora kompara ho uluk. Tanba ne’e, kontinua mellora rekursu  umanu no ho kondisaun infraestrutura ne’ebé harii kontribui servisu espesializada hodi atua krime organizadu la’ós fasil.

“Luta kontra krime organizadu la’ós fasil. Nune’e, husu atu kontinua hasa’e kapasidade hodi atua,” nia dehan.

Prezidente Repúblika, Francisco Guterres Lú Olo hamutuk ho Prokuradór Jerál Repúblika (PGR), Alfonso Lopez, koa fita hodi inaugra edifisiu gabinete sentrál Prokuradór-Jerál Repúblika (PGR) iha Colmera, kuarta (27/10). Imajen Tatoli/Egas Cristóvão.

Prokuradór Jerál Repúblika (PJR), Alfonso Lopez, hateten ho infraestrutura ne’ebé kria nu’udar parte ida hosi dezenvolimentu Ministéiru Públiku (MP) sei akumula servisu espesializada ho kondisaun funsiona seguransa di’ak liután ba majistradu no ofisiál justisa, funsionáriu apoiu tékniku hala’o servisu.

Nune’e mós, importante servisu Ministéiru Públiku kontinua dezempeña nia funsaun tuir kontistuisun hatuur ona no asume atuasaun propriu justisa ba sidadaun ne’ebé atividade penál barak hodi avalia servisu efikasia iha sidadaun sira-nia matan.

“Ho edifisíu ne’e bele mellora MP nia kapasidade efetivu, prezervasaun no rekolla prova sira, no koordena polísia orgaun kriminál iha asuntu kriminál hodi hasae kualidade servisu,” nia hateten.

Nune’e, instalasun edifísiu garantia kontabiliza, informátika, ba atuasaun kriminalidade organizadu tanba iha estatístika nasionál krime organizadu sai tendénsia ameasa ba nasaun.

Ezersisiu asaun penál krime organizadu hanesan trafiku droga, brankeamentu kapitál, korrupsaun no seluk tan.

Nia kompromete, gabinete ne’e importante reforsa atuasaun ho kualidade kombate krime organizadu.

Enkuantu, obra ne’e lokaliza iha PGR nia sorin, sei funsiona hanesan Gabinete Sentrál Kombate Korrupsaun no Kriminalidade Organizada no seluk mak Gabinete Kontesiozu Estadu no servisu espesializada rua ne’e funsiona depedénsia ba PGR.

Iha tinan 2019, Governu prevee orsamentu ba Prokuradória Jerál Repúblika iha kategoria kapitál dezenvolvimentu obra Gabinete rua ne’e ho andar ida, harii iha rai metru kuadradu 900-resin nia leten, moru protesaun haleu ho totál orsamentu hamutuk rihun $607-resin no konstrui hosi  kompañia lokál Bobolait.

Serimónia inagurasaun ne’e partisipa hosi Prezidente Repúblika, Francisco Guterres Lú-Olo, reprezentante Parlamentu Nasionál, Komisáriu Komisaun Anti-Korrupsaun (CAC) Sergio Hornai, Adjuntu Provedór Direitu Umanu no Justisa (PDHJ), ba área Boagovernasaun José Telo Cristovão, Diretór Polísia Sientífika Investigasaun Kriminál (PCIC) Vicente Brito, korpu diplomátiku no konvidadu sira seluk.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here