Estudante ESJ Calixa Boromatan Viqueque ne’ebé partisipa iha sensibilizasaun asuntu direitu umanu hosi PDHJ, iha salaun eskola, Viqueque villa, kuarta (27/10). Imajen TATOLI/Vitorino Lopes da Costa

VIQUEQUE, 27 outubru 2021 (TATOLI)-Provedoria Diretu Umanu no Justisa (PDHJ, sigla portugés) sosializa asuntu diretu umanu ba estudante Ensinu Senkundáru Jerál (ESJ) Calixa Boromatan Viqueque, durante loron ida.

Atividade ne’e ho tema ‘partisipasaun komunidade mak xave hodi proteje no promove diretu umanu no governasaun di’ak iha Timor-Leste’, ho objetivu atu hasa’e koñesimentu estudante.

Provedora PDHJ, Jesuina Maria Ferreira Gomes entrega livru no brosura ba parte eskola, iha salaun eskola, Viqueque villa, kuarta (27/10). Imajen TATOLI/Vitorino Lopes da Costa

“Ohin ami halo diseminasaun serbisu PDHJ ba estudante hodi bele hasa’e koñesimentu,” Provedora PDHJ, Jesuina Maria Ferreira Gomes, hateten ba Agência TATOLI, iha ESJ Calixa Boromatan, Viqueque villa, kuarta ne’e.

Biban ne’e, Provedora agradese ba Diretór Eskola ne’ebé simu prezensa hodi divulga informasaunba estudante sira tanba dala barak ema seidauk kompreende knaar PDHJ.

“Ohin estudante sira tuir sensibilizasaun hodi komprende bainhira iha indikasaun violasaun direitu umanu ruma, imi bele hato’o keixa ba PDHJ liuhosi meiu hanesan telefoni, karta, email no direta ba edífisiu sentrál,” nia informa.

Provedora konsidera estudante sai ajente transformadór hodi transmite informasaun ba família no kolega sira

“Ha’u apresia tebes ho maneira simu PDHJ no ita-boot hanesan futuru nasaun ne’ebé bele troka iha ha’u-nia fatin, Maromak nia planu ita nunka hatene,” nia enkoraja estudante.

Knaar PDHJ maka rejista keixa, loke investigasaun, halo monitorizasaun no promosaun.

Iha fatin hanesan, Diretór servisu edukasaun munisipál Viqueque, Emidio Amaral, agradese ba instituisuan ne’e tanba bele fahe informasaun ba estudante sira.

“Ha’u husu estudante sira ne’ebé tuir sensibilizasaun labele para iha imi, maibé tenke hatutan ba família no kolega sira kona-ba kestaun direitu umanu atu hamenus violénsia iha munisípiu Viqueque,” nia akresenta.

Iha biban hanesan, Diretór Eskola ESJ Calixa Boromatan, Rozito Soares do Rosario, hateten, estudante iha eskola ne’e hosi primeiru to’o terseiru ano hamutuk 542, maibé ohin tuir sensibilizasaun hamutuk 75.

“Agradese ba PDHJ tanba bele hakat mai ami-nia eskola hodi partilla infomasaun ba estudante sira. Durante atividade, ha’u husu estudante kumpre nafatin regra protokolu ba prevensaun COVID-19,” Rozito hameno.

Iha atividade ne’e nia rohan, instituisaun ne’e distribui livru no brosura PDHJ ba eskola.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here