Pesoál saúde fó vasina Pfizer ba estudante Eskola 30 agostu, iha resintu eskola, Comoro, kuarta (27/10). Imajen TATOLI/António Gonçalves

DILI, 27 outubru 2021 (TATOLI)–Ministru Edukasaun, Juventude no Desportu (MEJD), Armindo Maia, hateten, parte ministériu seidauk halo sansaun ruma ba estudante ho idade 12 to’o 17 la simu vasina.

Estudante Eskola 30 agostu forma atu simu formuláriu konkordánsia vasina Pfizer, iha resintu eskola, Comoro, kuarta (27/10). Imajen TATOLI/António Gonçalves

“Laiha sansaun ida tenke prega ba labarik sira kuandu la simu vasina, tanba sira sei kiik, ne’ebé kontinua tuir nafatin atividade aula prezensiál no mós ezame pasajen klase,” Ministru dehan iha lansamentu vasina Pfizer iha Eskola Ensinu Báziku Sentrál (EBC, sigla portugés) 30 agostu, Comoro, kuarta ne’e.

Tuir Ministru, maski Governu liuhosi Ministériu Saúde (MS) no MEJD iha meta ba programa vasina ne’e hodi proteje sidadaun hosi COVID-19, maibé la kria regra rigorozu hasoru labarik sira, ho kondisaun nafatin motiva estudante sira hodi simu vasina.

Pesoál saúde hatudu vasina Pfizer molok oferese ba estudante Eskola EBC 30 agostu, Comoro, kuarta (27/10). Imajen TATOLI/António Gonçalves

“Governu sira esforsu atu esplika ba inan-aman sira katak vasinasaun ne’e di’ak ba oan sira. Vasinasaun ne’ebé ohin lansa iha Eskola 30 agostu, Governu la’ós halo desizaun kalan ida, mehi no deside ona, maibé lori tempu naruk tanba hetan aprovasaun hosi Organizasaun Saúde Mundiál, tanba Timor-Leste hakarak hola parte ba vasina Pfizer,” Ministru subliña.

Notísia relevante: MEJD husu profesór no inan-aman apoia programa vasinasaun ba labarik

Estudante Eskola EBC 30 agostu hein atu simu formuláriu konkordánsia vasina Pfizer, iha resintu eskola, Comoro, kuarta (27/10). Imajen TATOLI/António Gonçalves

Iha biban hanesan, Diretór Eskola EBC 30 agostu Comoro, Filomeno Salsinha, hateten, eskola ne’e iha lista estudante idade 12 to’o 17 hamutuk 2.200, ne’ebé estudante na’in-10 mak hetan ona vasina.

“Ita iha estudante lubuk ida mak preparadu atu simu vasina Pfizer tanba sira-nia inan-aman asina ona formuláriu hosi Ministériu Saúde, espera katak estudante 2.000-resin ne’e bele hetan hotu vasinasaun,” nia akresenta.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here