Aeroportu Internasionál Prezidente Nicolau Lobato, Comoro, Dili. Imajen/Aerosxl

DILI, 27 outubru 2021 (TATOLI)–Vise-Ministra Finansa, Sara Lobo Brites, aprezenta Projetu Dekretu Governu ne’ebé hetan ona aprovasaun iha reuniaun Konsellu Ministru (KM) iha kuarta ne’e, kona-ba kriasaun unidade jestaun integrada ba projetu dezenvolvimentu Aeroportu Internasionál Prezidente Nicolau Lobato, Comoro.

“Unidade ne’e sei iha dependénsia ba Primeiru-Ministru no iha misaun atu fó apoiu tékniku ba Governu iha ezekusaun projetu dezenvolvimentu Aeroportu Internasionál Prezidente Nicolau Lobato, iha artikulasaun ho departementu Governu oioin, servisu no entidade Administrasaun Públika,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Tuir Portavós Governu, unidade ne’e importante tanba sira mak sei apoiu Governu no parseiru seluk ne’ebé implementa projetu no privadu hirak ne’ebé sei ezekuta obra sira, nune’e prosesu sira bele la’o ho di’ak, ho akompañamentu Governu.

Antes ne’e, iha loron 01 outubru 2021, Ministru Finansa, Rui Augusto Gomes, reprezenta Governu Timor-Leste no Reprezentante Banku Dezenvolvimentu Aziátiku (ADB, sigla inglés), Sunil Mitra, sesta ne’e, asina akordu empréstimu ho montante millaun $135 hodi dezenvolve Aeroportu Internasionál Prezidente Nicolau Lobato, Comoro.

Notísia relevante: Timor-Leste selebra akordu finansiamentu ho parseiru hodi dezenvolve Aeroportu Comoro

Nune’e, orsamentu empréstimu ne’e sei finansia projetu estensaun pista atterajen, konstrusaun torre-kontrolu tráfiku aéreu no reabilitasaun fasilidade sira seluk iha aeroportu.

Hosi parte Governu Timor-Leste, sei aloka orsamentu millaun $300 hodi finansia obra konstrusaun sivíl, akizasaun rai, kompensasaun ai-horis no kustu seluk relasiona ho reasentamentu família sira ne’ebé mak hela besik iha aeroportu, ne’ebé totál kustu ba konstrusaun aeroportu hamutuk millaun $80.

Antes ne’e, Governu kria ona Komisaun interministeriál, ne’ebé kompostu hosi Ministériu Planu no Ordenamentu, Ministériu Transporte no Komunikasaun, Ministériu Obra Públika, Ministériu Negósiu Estranjeiru no Kooperasaun no Ministériu Finansa, ne’ebé hetan apoiu tékniku hosi ADB, Governu Japaun, Austrália no International Finance Corporation (IFC).

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here