Vise Primeiru-Ministru no Ministra Solidaridade Sosiál no Inkluzasaun, Armanda Berta dos Santos, prezide reuniaun Konsellu Ministru. Iha Palásiu Governu, kuarta (27/10). Imajen TATOLI/Francisco Sony

DILI, 27 outubro 2021 (TATOLI)—Governu liuhosi reuniaun Konsellu Ministru (KM) aprova Projetu Dekretu Governu kona-ba medida ezekusaun Deklarasaun Estadu Emerjénsia ba dala-XIX, hosi Dekretu Prezidente Repúblika númeru 95/2021, loron 26 outubru, hodi hatán ba pandemia COVID-19.

EE ne’ebé daudaun ne’e renova ona, abranje ba territóriu nasionál tomak no sei vigora hosi oras tuku 00:00 loron 30 outubru 2021 to’o tuku 23:59 iha loron 28 novembru 2021.

“Medida ezekusaun deklarasaun Estadu Emerjénsia anteriór, rejista de’it alterasaun ida no estabelese katak asesu ba servisu administrativu balun tenke komprova vasinasaun kompleta kontra SARS-CoV-2/COVID-19, ka iha alternativa tenke komprova rezultadu negativu teste detesaun COVID-19, ne’ebé hala’o ho antesendénsia labele liu loron-lima,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu, kuarta ne’e.

Notísia relevante: Governu kontinua solisita PR renova deklarasaun EE da-XIX

Medida ezekusaun  EE ne’e aprova hafoin hafoin halo análiza ba aprezentasaun kona-ba pontu situasaun epidemiolojikál país nian, ne’ebé hala’o hosi Koordenadór Sala Situasaun Sentru Integradu Jestaun Krize (CIGC, sigla portugés).

Enkuantu, regra seluk mantein nafatin, liuliu obriga ema hotu ne’ebé maka hela iha Timor-Leste atu mantein distánsia pelumenus metru ida ho ema seluk  ne’ebé la hela iha fatin hanesan, uza máskara oin nian ne’ebé taka inus no ibun bainhira hakarak atu tama ka hela iha fatin públiku ka privadu ne’ebé mak ema hotu uza, no fase liman bainhira hakarak tama iha estabelesimentu komersiál, industriál ka prestasaun servisu ka edifísiu sira ne’ebé maka servisu administrasaun públika nian funsiona.

Durante vijénsia EE, lisensa, autorizasaun, vistu no autorizasaun rezidénsia no aktu administrativu sira-seluk sei válidu nafatin, la haree ba nia prazu validade.

Biban ne’e, Governante ne’e mós informa públiku katak informasaun espalla iha rede sosiál ne’ebé temi katak Governu sei aplika filafali konfinamentu obrigatóriu ne’e laloos.

“Agora ita laiha konfinamentu, iha de’it mak Estadu Emerjénsia, tanba ne’e maka informasaun ne’ebé espalla laloos. Governu la hatúr lockdown tanba  ita iha situasaun ida, maibé nafatin presiza Estadu Emerjénsia atu fó kbiit nafatin ba Governu karik surtu ruma mosu, Governu bele halo atuasaun lalais, no mós ho Estadu Emerjénsia ida ne’e fó nafatin hanoin mai ita atu kumpre protokolu saúde, ne’ebé laiha konfinamentu,”Ministru Fidelis klarifika.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here