Estudante ESG Dom Martinho da Costa Lopes, Maliana, foto hamutuk ho ekipa Sekretaria Estadu ambiente (SEA), hafoin inaugura programa ‘eskola verde’. Imajen TATOLI/Sérgio da Cruz.

BOBONARO,27 outubro 2021 (TATOLI) — Ensinu Sekundária Jerál (ESG, sigla portugés) Dom Martinho da Costa Lopes, Maliana, nu’udar eskola dahuluk iha munisípiu Bobonaro implementa programa ‘eskola verde’.

Sekretaria Estadu Ambiente (SEA) liuhosi Diresaun Sentru Edukasaun no Informasaun Ambientál (CEIA, sigla portugés), segunda ne’e inaugura plaka programa ‘eskola verde’ hodi deklara ba públiku katak eskola refere sai nu’udar eskola dahuluk ne’ebé integra valór ambiente, iha munisípiu Bobonaro.

Diretora CEIA, Amenica Machado Fernandes, esplika programa ‘eskola verde’ nu’udar instrumentu importante tebes atu aplika iha eskola, hodi fó vantajen di’ak ba manorin no estudante sira, atu estuda iha ambiente ne’ebé saudável no eduka inan-aman inklui sosiedade tomak hamenus uza plástiku, halo resiklazen no trasforma plástiku uzadu sai produtu útil ba nesesidade loroloron.

“Ha’u fó parabéns ba imi, tanba imi mak primeira-vez  implementa programa ne’e, tanba ne’e ha’u dezafia ita boot sira mai hamutuk hamatak ita-nia ambiente hodi hatudu ezemplu  di’ak ba eskola seluk atu banati-tuir saida mak imi halo,” Diretora CEIA ne’e ko’alia Maliana.

Atu prezerva ambiente sai matak liu iha futuru, nia enkoraja manorin-na’in no estudante sira tenke iha komitmentu no vontade hamosu planu no programa ne’ebé amigável hodi halo ambiente sai buras.

Tanba eskola nu’udar sentru edukasaun ne’ebé prepara ema-nia mentalidade, muda ema-nia atitude ne’ebé kontinua tesi-ai, sunu-rai no soe lixu arbiru inklui estraga ambiente no biodiversidade balada tasi no rai-maran.

Bainhira manorin-na’in no estudante sira  implementa programa ho di’ak, SEA sei fó oportunidade ba eskola refere atu ba tuir kompetisaun ‘eskola verdi’ iha nível nasionál.

“Prémiu ba vensedór sira hahú hosi $2000 to’o $2500, ne’e duni ne’e ha’u nafatin hadomi imi-nia ambiente tanba iha barómetru lubuk-ida mak ami haree inklui imi-nia aplikasaun regulamentu atu halo mudansa ba ambiente,” nia katak.

Purtantu, Diretór Edukasaun Munisípiu Bobonaro, Crispim Moniz, akresenta programa ne’e importante hodi konkretiza no hafurak liután infraestrutura eskola nian.

“Atu konkretiza mehi ida-ne’e ami halo ona ezbosu balun no ami presiza diskute kle’an ho diretór eskola no profesór sira hotu atu foti desizaun koletiva hodi aprezenta ba minstru edukasaun, nune’e implementa iha eskola sira hotu,” nia katak.

Diretór Ensinu Sekundáriu Jerál Dom Martinho da Costa Lopez, Juvêncio de Jesus, konsidera programa ne’e relevánsia ho atividade kurríkular, no sai ezemplu konkreta ida atu estudante no manorin-na’in sira aproveita ambiente ne’ebé moos no matak.

Totál estudante iha eskola Dom Martinho da Costa Lopez Maliana, hosi désimu-anu to’o désimu-segundu hamutuk 2,585.

Notísia relevante: EBC Esperansa da Pátria Modelu ba Programa Eskola Verde iha Timor-Leste

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here