Prezidente Sentru Juveníl Timor-Leste, Gregorio Correira. Imajen TATOLI/Sérgio da Cruz.

BOBONARO,26 outubro 2021 (TATOLI) — Sentru Treinamentu Futeból Juveníl Munisípiu Bobonaro (CTFJMB sigla portugés), realiza kompetisaun jogu  futeból juveníl sub-12 to’o 14 iha kampu futeból Maliana ba époka 2021 nian.

Jogu ne’e abertura ofisialmente hosi Prezidente Sentru Juveníl Timor-Leste, Gregorio Correia, akompaña hosi Administradór Postu Administrativu Maliana, Tomás Laca Loe no Vise-Prezidente Asosiasaun Futeból Bobonaro, José Guterres.

Iha abertura, ekipa sub-12 hosi Rokon FC kontra Becora FC ho rezultadu empate 1:1. Enkuantu jogu kompetisaun lidera hosi árbitru Lucas Felix, João Assis no Longuinhos Correia. Árbitru hirak-ne’e mai hosi Asosiasaun Futeból Bobonaro (AFB), ne’ebé sertifika ona ho nível bázika hosi departamentu arbitrajen nasionál FFTL.

Prezidente Gregorio Correia, hateten, jogu ne’e nu’udar planu ida atu loke tán liras iha nível munisípiu nune’e prepara futebolista juveníl sira-nia mentalidade ba kompete iha nível nasionál.

“Jogu ne’e objetivu atu identifika jogadór juveníl potensiál sira iha nível munisípiu. Iha jogu modelu festivál mak sira sub-12 ne’e no kompetisaun mak sub-14, agora ita loke eventu ne’e bainhira jogu ne’e remata treinadór sira sei halo selesaun ida-ne’ebé mak di’ak, ita sei haruka sira joga ho juveníl sira iha Dili,” nia informa ba jornalista sira, iha kampu futeból Maliana, tersa ne’e.

Tuir planu eventu ne’e sei realiza mós iha munisípiu Viqueque, Manufahi, Ainaro no Aileu, atu halibur futebolista juveníl sira iha territóriu nasionál tau forsa hamutuk hodi reprezenta Timor-Leste ba kompete iha nível internasionál.

Purtantu,Vise-Prezidente Asosiasaun Futeból Bobonaro José Guterres, enkoraja futebolista sira atu hatudu displina no tátika jogu nune’e bele reforsa ekipa juveníl Bobonaro ba kompete iha nível nasionál.

Entretantu, Asistente Treinadór Juveníl Munisípiu Bobonaro, Bruno Agostinho da Costa, informa, eventu ida-ne’e labarik sira bele hatudu sira-nia jogu.

“Ha’u iha esperansa katak liuhosi jogu ida-ne’e ita bele hetan jogadór ne’ebé kualidade nune’e bele lori ekipa munisípiu ba kompete iha nasional,” nia katak.

Enkuantu klubu ne’ebé partisipa iha eventu ne’e hosi ekipa festivál sub-12 hamutuk hitu no ekipa kompetisaun sub-14 hamutuk ualu, mai hosi suku hitu iha postu administrativu Maliana no postu administrativu sira seluk.

Fundu ba realizasaun eventu ne’e hetan apoia hosi SEJD ho totál orsamentu rihun $3,500 ne’ebé sei gasta ba hola taxa, preparasaun ba realizasaun eventu no selu arbitrajen.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here