Atividade populasaun iha suku Babulu, kuarta (27/10). Imajen TATOLI/Vitorino Lopes da Costa

VIQUEQUE, 27 outubru 2021 (TATOLI)-Abitante hamutuk 200-resin hosi suku Babulu, postu administrativu Uatulari, munisípiu Viqueque seidauk asesu ba bee-moos.

“Iha ne’e, populasaun barak maka asesu ona bee-moos, maibé populasaun aldeia ida iha uma-kain 200-resin maka agora seidauk asesu ba bee-moos,” Xefe suku Babulu, Mario Trindade, hateten ba Agência TATOLI, iha Viqueque, kuarta ne’e.

Ba kestaun ne’e, iha ona planu, hosi orsamentu Reziliénsia Komunitária Suku (RKS) hosi Planu Nasionál Dezenvolvimentu Suku (PNDS) ne’ebé sei destina ba suku sira inklui suku Babulu, ne’ebé sei fó perioridade dada bee-moos ba komunidade ne’ebé seidauk asesu bee-moos.

Notísia relevante: Austrália apoia millaun $15,5 ba Timor-Leste implementa programa rua

“Ami planu ona hosi Reziliénsia Komunitária Suku, aloka ba suku Babulu $30.200, hodi dada bee hosi aldeia Liaside hodi distribui ba abitante ne’ebé seidauk asesu ba bee-moos,” nia akresenta.

Suku Babulu ho totál populasaun 2.718, kompostu hosi mane na’in-1.323 no feto na’in-1.935 hosi uma-kain hamutuk 636, ne’ebé suku ne’e iha aldeia ualu, aldeia hitu asesu ona bee-moos no ida mak seidauk asesu.

Tuir governante ne’e, Governu Austrália sei realiza kontribuisaun  finanseira direta ida ho valór millaun AU$20 ka besik millaun US$15,5, hodi fó apoia ba komunidade liuhosi projetu Reziliénsia Komunitária Suku, ne’ebé sei hadi’a infraestrutura sira liuhosi Programa PNDS no implementa projetu Bolsa da Mãe Jerasaun Foun.

Antes ne’e, iha maiu 2020, Governu Austrália entrega apoiu millaun $ 4,6 hodi apoiu PNDS, ne’ebé benefisia suku 150, hodi harii infraestrutura bázika hanesan irrigasaun, bee moos, klínika no seluk tan.

Enkuantu, projetu Bolsa da Mãe implementa hosi Ministériu Seguransa Sosiál no Inkluzaun (MSSI), ho objetivu atu redúz má nutrisaun, redúz pobreza iha Timor-Leste, ne’ebé ho nia alvu ba inan isin-rua inklui bebé idade zero to’o loron 1.000.

MSSI sei fó ba inan isin-rua hamutuk $15 kada fulan, bebé moris-mai $20, no bebé ne’ebé moris-mai ho kondisaun defisiente sei aumenta-tan $10 sai $30, tanba bebé defisiente nesesidade boot-liu kompara ho bebé ne’ebé moris-mai ho kondisaun normál.

Programa subsídiu bolsa da mãe ne’ebé agora daudaun iha, hahú implementa iha 2012 atu sustenta família vulnerável ho kada benefisiáriu, fulan ida simu $5 no tinan ida $60, maibé família ida labarik na’in-tolu mak rejista, entaun totál tinan ida $180.

Tuir dadus hosi MSSI, oras ne’e daudaun benefisiáriu bolsa da mãe iha territóriu hamutuk 47.539.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here