Komunidade sira hamoos hela valeta laran liuhosi programa Mão de Obra. Imajen TATOLI/Sérgio da Cruz.

BOBONARO,26 outubro 2021 (TATOLI)— Implementasaun programa mão de obra faze dahuluk iha postu administrativu Maliana, munisípiu Bobonaro atinje ona 85%.

Administradór postu administrativu Maliana, Tomás Laca Loe, informa faze dahuluk sei konklui iha semana oin tanba atividade iha terrenu hatudu progresu di’ak.

“Programa ne’e ita hahú lansamentu ona, durante ne’e komunidade sira badinas tebes halo serbisu no tuir ami-nia observasaun haree katak atinje ona 85%. Ita hakarak finaliza lalais, nune’e hatama fali proposta ba faze daruak nian,” nia informa ba Agência TATOLI, iha nia kna’ar-fatin, tersa ne’e.

Programa refere la’o dala-ida ho suku hitu  mak hanesan suku HolsaLahomea, OdamauRai Fun, Ritabou, Saburai no Tapo Memo. Komunidade sira halo limpeza jerál ba estrada rurál, hamoos valeta, ateru no taka estrada kuak hodi fasilita movimentasaun transporte públiku no fasilia atividade ekonomia.

Durante implementasaun iha suku Saburai diferente ho suku sira seluk, tanba autoridade lokál no komunidade hola inisiativa rasik hadi’a no ateru dalan besik kilómetru rua, hosi estrada rurál liga ba postu Unidade Patrullamentu Fronteira (UPF), kompaña Alfa postu Saburai.

“Serbisu ida-ne’e la tuir ona matadalan programa ne’e, la’ós administradór mak obriga, maibé sira rasik mak hakarak ho razaun sira haree UPF nia postu provizóriu besik fali komunidade, tanba estrada no bee laiha, sira abandona tiha postu foun, entaun sira loke dalan foun atu fasilita UPF halo serbisu iha postu foun hodi asegura ita-nia fronteira,” nia haktuir.

Komunidade suku Ritabou, Alita Pereira Gonçalves, sente kontente ho programa ne’e tanba bele kontribui rekupera ekonomia família nian.

“Durante COVID-19 ami la buka osan tanba serbisu laiha, ne’e duni governu fó serbisu kiik ida ne’e, ami agradese tebes tanba osan ida-ne’e bele sosa netik foos, mina ho hahán ruma no restu oan fó ba oan sira hán iha eskola,” nia katak.

Totál orsamentu ba administrasaun postu administrativu Maliana liuhosi OJE 2021 ho montante $50.000,00. Hosi montante nee’e koloka ba faze dahuluk $24,738,00 no orsamentu ne’e fahe ba parte tolu mak hanesan, kompra materiál serbisu, finánsia atividade operasionál no selu traballadór sira.

Tuir sensu uma ka’in 2015, Maliana iha suku hitu ne’e ho totál populsaun hamutuk 28,908 kompostu hosi mane 14,538 no feto 14,370 ho totál uma-kain 4,942.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here