Komandante Polísia Tránzitu Munisípiu Dili, Inspetór Polísia Domingos Gama. Imajen TATOLI/ Natalino Costa

DILI, 26 outubru 2021 (TATOLI)— Komandu Polísia Munisípiu Dili investiga ona suspeitu motorista ho inisiál A ne’ebé lori karreta Estadu, xapa matríkula 05.930 G soke kanek vítima Octavio Soares no Ana Letijia Soares ho motór Honda Beat Street mutin iha área Colmera, Dili, segunda (25/10).

Komandante Polísia Tránzitu Munisípiu Dili, Inspetór Polísia Domingos Gama, informa, asidente tráfegu ne’ebé rezultadu vítima na’in rua ne’e kanek grave.

“Ita investiga ona suspeitu nuudar funsionáriu públiku iha Diresaun Nasionál Seguransa Patrimóniu Públiku (DNSP) iha Sekretaria Estadu Protesaun Sivil (SEPS) no la halo detensaun tanba asidente tráfegu ne’e konsidera hanesan kazu niglizente,” Inspetór Polísia Domingos ba Jornalista sira iha knaar fatin, Caicoli, tersa ne’e.

Nia dehan, rezultadu investigasaun hatudu asidente ne’e akontese kauza hosi suspeitu lori karreta ho kondisaun lanu no viola sinál tránzitu.

“Ha’u hanoin suspeitu iha kestaun ne’e sempre koopera no sei la halai ses hosi nia responblidade relasiona kazu ne’ebé komete,” Komandante Polísia Tránzitu ne’e akresenta. 

Daudaun, vítima nain rua ne’ebé hetan soke hala’o hela tratamentu Saude iha Hospitál Nasionál Guido Valadares (HNGV) tanba  kondisaun grave.

Polisia Nasionál Timor-Leste (PNTL), liuhosi Komandu Polísia Tránzitu munsípiu Dili, hahú fulan janeiru to’o outubru, rejista ema na’in-12 mate tanba kauza asidente tráfegu.

Jornalista         : Natalino Costa    

Editór               : Florencio Miranda Ximenes

 

PUBLISIDADEiklan

HAKEREK NO HATÁN

Please enter your comment!
Please enter your name here