Prezidente Parlamentu Nasionál (PPN), Aniceto Longuinhos Guterres Lopes. Imajen TATOLI/Francisco Sony.

DILI, 26 outubru 2021 (TATOLI)—Parlamentu Nasionál liuhosi reuniaun lidér Bankada Parlamentár halo diskusaun aprova giaun no kalendáriu diskusaun Orsamentu Jerál Estadu (OJE) 2022.

Tuir kalendáriu, diskusaun sei hahú ho semináriu panorma orsamentál iha loron 27 to’o 29 outubru iha Tibar-Liquuiça, ba audiénsia públika hahú iha 04 fulan novembru ho jeneralidade, espesialidade no termina iha 15 dezenbru, hafoin komisaun C trata asuntu Finansa Públika halo redasaun finál no iha 20 dezembru 2021 envia ba Prezidente Repúblika hodi halo promulgasaun.

Prezidente Parlamentu Nasionál, Deputadu Aniceto Longuinhos Guterres, hateten kalendáriu ne’e sei guia prosesu debate OJE 2022.

“Ohin, ita fiksa kalendáriu no komisaun ida-idak hato’o ona ba instituisaun relevante sira, nune’e Parlamentu ho Governu bele halo diskusaun OJE 2022 hahú ho semináriu panorama orsamentál no audénsia públika, jeneralidade ho espesialidade,” Aniceto Guterres anunsia liuhosi reuniaun ho lidér bankada iha sala plenária, tersa ne’e.

Antes ne’e, iha loron 15 outubru tinan ne’e, Governu liuhOsi Ministériu Finansa submete ona proposta Lei Orsamentu Jerál Estadu (OJE) 2022 ho montante biliaun $1,675 ba Parlamentu Nasionál.

Proposta Lei ne’e Governu entrega iha sala Komisaun C ne’ebé trata asuntu Finansa Públika no simu hosi Prezidente Parlmentu Nasionál (PPN), Aniceto Guterres.

Proposta OJE 2022 ne’e hetan redusaun 17,5% hosi OJE Ratifikadu 2021 ho montante biliaun $1,2.

Notísia Relevante: Governu submete Proposta Lei OJE 2022 biliaun $1,675 ba PN

Jornalista : Nelson de Sousa

Editór       : Cancio  Ximenes

PUBLISIDADEiklan

HAKEREK NO HATÁN

Please enter your comment!
Please enter your name here