Prezidente Autoridade Munisípiu Baucau, Olívio “Bou Lesa” Freitas. Imajen/Espesiál.

BAUCAU, 26 outubru 2021 (TATOLI)— Munisípiu Baucau, tersa ne’e selebra aniversáriu ba dala-V nune’e Prezidenti Autoridade Munisípiu (PAM), Olívio ‘Bou-Lesa’ Freitas husu entidade hotu iha munisípiu refere tenke komunga prinsípiu unidade nasionál nune’e hasai povu hosi kiak no mukit.

Olívio ‘Bou-Lesa’ Freitas, husu entidade hotu presiza unidade atu dezenvolve Baucau sai di’akliu iha área administrasaun, edukasaun, saude, agrikultura, seguransa alimentár, asaun sosiál, protesaun sivíl no jestaun dezastre naturál.

Nune’e mós apoia organizasaun naun governaamentál no organizasaun komunitária, rejistu notariadu, servisu kadastrál, jestaun merkadu, turizmu no dezenvolvimentu komunitáriu.

“Mai ita serbisu hamutuk, kolabora malu, serbisu ho dedikasaun, kuriozidade no kreatividade hodi dezenvolve munisípiu Baucau. Ita tenke komunga prinsípiu unidade, ierarkia no koordenasaun entre orgánika ho delegasaun territoriál sira iha munisípiu Baucau no entidade públiku, privadu no sosiedade sívil sira atubele fó solusaun ba povu nia problema,” Bou Lesa, ko’alia iha Sentru Konvensaun Baucau (CCB, sigla portugés).

Nia husu entidade hotu tenke serbisu maka’as fó solusaun ba povu nia problema, maibé tenke iha planu, programa, atividade, orsamentu ho kualidade, rekursu umanu, koordenasaun no kolaborasaun ho entidade tomak.

Entidade hotu iha munisípiu Baucau tenke komunga prinsípiu 19 hosi dekretu-lei númeru 3/2016, 7 marsu, kona-ba legalidade, espesialidade no buka interese públiku.

Nune’e mós transparénsia (nakloke-aan), deskonsentrasaun administrativa, igualdade, respeitu ba direitu subjetivu no interese lejítimu administrativu sira, proporsionalidade, justisa, imparsiál, partisipasaun, interesadu, dezisaun, utilizasaun lian ofisiál, responsabilidade, prestasaun, koerénsia no efisiénsia.

Prinsipiu seluk ne’ebé tenke kaer-metin no aplika ba inisiativa lokál no partisipasaun populasaun nian iha solusaun ba problema lokál.

Entretantu, selebrasaun aniversáriu ba dala-V ne’e hahú ho misa agradesimentu iha Parókia Santo António Vila Antiga kontinua ho jogu, kompetisaun pintura ba estudante sira no fahe prémiu.

Pozisaun jeográfika Autoridade Munisipál Baucau ho luan área hamutuk 1,494 km² ho populasaun 111,694 tuir sensu 2010. Autoridade Munisipál Baucau iha Posto Administrativu neen (6) ho suku 59 no aldeia 282.

Notísia relevante: Baucau propoin millaun $4-resin iha OJE 2022

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here