MPO liuhosi Dirasaun Jerál Ordenamentu Teritóriu sosializa lei baze ordenamentu teritóriu ba autoridade lokál munisípiu Dili, iha salaun City 8, Manleuana, tersa (26/10). Imajen TATOLI/Francisco Sony

DILI, 26 outubru 2021 (TATOLI)–Governu liuhosi Ministériu Planu no Ordenamentu (MOP) realiza atividade sosializasaun lei baze ordenamentu territóriu durante loron-rua, hahú loron 26 to’o 27 outubru ba autoridade lokál munisípiu Dili.

Vise Primeiru-Ministru no Ministru Planu no Ordenamentu, José Maria dos Reis, konsidera autoridade lokál presiza atu hatene lei baze ordenamentu territóriu atu hadi’a sidade Dili.

Vise Primeiru-Ministru no Ministru Planu no Ordenamentu, José Maria dos Reis. Imajen TATOLI/Francisco Sony

“Ezemplu iha Dili tenke iha zona komersiál rasik, maibé realidade ema harii uma tuir hakarak. Sidade Dili tenke hadi’a, tanba ne’e ministériu prodús instrumentu atu fó dalan ba planu dezenvolvimentu nasionál, maibé sein iha planu nasionál dezenvolvimentu territóriu, enkuantu ierarkiamente planu nasionál iha leten, hafoin planu ordenamentu munisipál no planu urbanu atubele fó dalan ba planu dezenvolvimentu nasionál,” Ministru Planu no Ordenamentu hateten iha atividade sosializasaun iha salaun City 8, Manleuana, tersa ne’e.

Notísia relevante: MPO tau prioridade ba planeamentu no ordenamentu territóriu

Ministru dehan, atu halo planu dezenvolvimentu iha munisípiu, presiza iha planu ordenamentu ida atu fó informasaun ba potensialidade, karaterístika territóriu no halo dezenvolvimentu ekonómiku di’ak iha munisípiu.

Tanba ne’e, governante ne’e husu partisipasaun autoridade lokál bele fó informasaun no hanoin iha sosializasaun ba lei baze ordenamentu, nune’e bele hadi’a liután ba oin tanba liga ho polítika desentralizasaun iha Timór laran tomak.

MPO liuhosi Dirasaun Jerál Ordenamentu Teritóriu sosializa lei baze ordenamentu teritóriu ba autoridade lokál munisípiu Dili, iha salaun City 8, Manleuana, tersa (26/10). Imajen TATOLI/Francisco Sony

Membru Ezekutivu ne’e nota mós katak, tinan 20 ona Governu foin hanoin atu halo planu ordenamentu territóriu, maski uluk iha ona planu maibé la realiza to’o agora.

Instrumentu planeamentu fó dalan ba Governu atu halo dezenvolvimentu iha rai-laran, tanba sein iha instrumentu planu ordenamentu hanesan lei baze ordenamentu, sidade ida sai dezorganizasaun kontra karaterístika natureza rasik.

“Realidade iha loron 04 abríl liubá, fó lisaun boot ba ita tenke hadi’a buat ruma iha Dili laran, tanba ekipa Ministériu Planu Ordenamentu hahú fofoun, halo kedas sosializasaun kona-ba lei baze ordenamentu territóriu no daudaun ne’e la’o iha munisípiu lima no tinan oin MPO sei ramata halo planu nasionál ordenamentu territóriu,” nia tenik.

Hahú planu urbanu iha Dili

MPO foin hahú ho planu urbanu iha Dili, hanesan kontinuasaun hosi estudu ne’ebé antes ne’e JICA halo no hein katak tinan ne’e bele ramata lavantamentu planu urbanu.

“Planu urbanu Dili importante tebes atu fó dalan ba ita atu hatuur sidade Dili didi’ak. Problema boot durante tinan 20 no festa natureza mai ita, husu atu halo reflesaun di’ak atubele hadi’a sidade Dili. Ezemplu loron ruma ahi-han uma iha fatin ruma, bombeiru susar tama hodi hamate ahi no problema boot iha sidade Dili mak lixu ne’ebé sei sai komplikadu tebes, tanba ne’e presiza halo jestaun ba lixu iha Dili laran,” Ministru José Maria Reis dehan.

Iha biban hanesan, Prezidente Autoridade Munisípiu (PAM) Dili, Gulhermina Filomena Saldanha Ribeiro, hateten, atividade ne’e atu disemina lei ne’ebé iha relasaun ho kompeténsia autoridade munisípiu Dili.

Prezidente Autoridade Minisípiu Dili, Guilhermina Filomena Saldanha. Imajen TATOLI/Francisco Sony

“Liuliu dekretu-lei ne’ebé ko’alia kona-ba estrutura ámbitu autoridade munisipál no munisípiu, maibé antes atu tama ba asuntu, ami sente importante tebes  tanba administradór postu no suku importante atu integra ona produtu lei baze ordenamentu territóriu. Tanba ne’e se hakarak ko’alia ordena Dili, tenke disimina lei baze ordenamentu territóriu no rejime jurídiku utilizasaun solo, entaun ami aproveita oportunidade ne’e konjuga,” nia dehan.

Aleinde ne’e, PAM Dili dehan, durante atividade ne’e la’o sei iha mós matéria kona-ba desentralizasaun administrativa no dezenvolvimentu rurál.

“Diseminasaun ba autoridade lokál importante atubele aumenta sira-nia kapasidade,” nia akresenta.

Atividade ne’e partisipa mós hosi Ministru Administrasaun Estatál, Miguel Carvalho, PAM Dili, Administradór postu Dili, Xefe suku sira iha Dili, inklui entidade relevante.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here