Diretór Servisu Protesaun Sivíl Jestaun Dezastre Munisípiu Baucau, Nelson Nunes. Imajen TATOLI/Natalino Belo.

BAUCAU, 26 outubru 2021 (TATOLI) – Governu liuhosi Sekretaria Estadu Protesaun Sivíl (SEPS), tersa ne’e apoia materiál kontrusaun ba vítima dezastre naturál hamutuk 210 iha munisípiu Baucau.

Vítima dezastre naturál hirak-ne’e hetan apoia relasiona ho dezastre ne’ebé akontese iha tinan 2020 to’o 4 abríl 2021 liubá. Apoia ne’e oferese liuhosi diresaun servisu protesaun sivíl jestaun dezastre munisipál.

“Ita apoia materiál konstrusaun tuir klasifikasaun ne’ebé identifikadu,” Diretór Servisu Protesaun Sivíl Dezastre Munisípiu Baucau, Nelson Nunes, ko’alia iha Sentru Konvensaun Baucau (CCB, sigla portugés) vila antiga.

Hosi benefisiáriu 210 kompostu hosi postu administrativu Baucau Vila iha 45, Laga hamutuk 16, Vemasse sia (9), Baguia 18, Quelicai hamutuk 75 no Venilale 74.

Purtantu, uma-ne’ebé aat totál iha Baucau vila hamutuk hitu (7), Laga haat (4), Vemasse tolu (3), Baguia lima (5), Quelicai 28 no Venilale 20.

Enkuantu klasifikasaun aat kmaan iha postu administrativu Baucau Vila hamutuk 38, Laga 12, Vemasse neen (6), Baguia ida (1), Quelicai 46 no Venilale 27.

Komisaun dezastre mós ajuda orsamentu mão de obra no ai kuadradu ba vítima sira, totál orsamentu ne’ebé apoia hosi governu hamutuk $ 46.324 ne’ebé fahe ba klasifikasaun rua hanesan aat totál hosi uma-kain 68 ho montante orsamentu $25.024 no aat kmaan totál benefisiáriu 142 ho orsamentu hamutuk $21.300.

Nune’e mós apoia rekuperasaun mak hanesan besi, kalen, pregu no ai ho orsamentu $150, kalen-tahan 50 no pregu, aat totál kalen-tahan 50, simentu 25, pregu, besi no orsamentu $ 368 kompostu $150 ba mão de obra no $200-resin aloka ba ai kuadradu.

“Sira rasik mak sei halo obra tanba balun afeta hosi inséndiu, ain sobu no rai halai inklui inundasaun,” Nelson akresenta.

Vítima sira rasik iha akordaun ho governu no halo kompromsiu atu harii rasik uma iha fatin ne’ebé seguru no parte diresaun sei monitoriza durante faze konstrusaun.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here