Koordenadór Sekretariadu Adezaun Timor-Leste ba OMK, Cesar Dias Quintas. Imajen TATOLI/Francisco Sony

DILI, 26 outubru 2021 (TATOLI)–Ministériu Koordenadór Asuntu Ekonómiku (MKAE) liuhosi Ekipa Téknika ba Organizasaun Mundiál Komérsiu (OMK) partilla informasaun prosesu adezaun ba estudante Dili Institute of Technology (DIT).

Koordenadór Sekretariadu Adezaun Timor-Leste ba OMK, Cesar Dias Quintas, hateten, objetivu fahe informasaun ba estudante sira tanba hanesan programa importante Governu liuhosi ministériu ba prosesu adezaun, hodi halo konslutasaun, sensibilizasaun no sosializasaun.

“Ida-ne’e importante tanba elementu hotu iha Timor-Leste presiza hatene prosesu adezaun, inklui organizasaun sira seluk ein termu komérsiu globál iha rejionál hanesan Asosiasaun Nasaun Sudeste Aziátiku (ASEAN, sigla inglés),” Koordenadór ekipa hateten iha salaun DIT, tersa ne’e.

Notísia relevante: Timor-Leste hahú hatudu pasu pozitivu adere ba OMK

Atividade ne’e hetan apoiu hosi parseiru dezenvolvimentu Enhaced Integrated Framework (EIF) ho totál orsamentu $10.000 to’o $20.000.

Tuir Responsável programa, bainhira atu adere ba OMK presiza prienxe rekezitu no halo akordu negosiasaun ne’ebé iha konkordánsia hosi estadu membru organizasaun.

“Regulamentu sai hanesan rekezitu, ne’ebé atu tama ba OMK liuhosi meiu tolu hanesan bilaterál, multilaterál no uniterál, ne’ebé bainhira liu etapa ne’e mak ita konkorda malu ho membru sira atu ita-nia akordu ho sira bazeia ba ita-nia interese nasionál,” Cesar Dias Quintas esplika.

Tanba ne’e, atividade sosializasaun ba oin sei kontinua nafatin tanba molok Timor-Leste tama OMK, sei halo sosializasaun hosi mídia, semináriu, no workshop.

“Durante sosializasaun ne’e, presiza parte hotu nia kontribuisaun liuhosi sira-nia hanoin, diskusaun no rekomendasaun balun atubele hato’o durante prosesu ne’e,” nia dehan.

Iha fatin hanesan, estudante DIT, Manuel Oliveira, apresia ho inisiativa tanba hanesan estudante presiza informasaun barak hodi prepara-an ba dezenvolvimentu nasaun.

“Ha’u kontente tebes tanba ekipa adezaun OMK halo sensibilizasaun ba ami, ida-ne’e di’ak tebes tanba bele kapasita ami hodi aprende no sai estudante ne’ebé maduru,” nia tenik.

Durante ne’e Timor-Leste hamutuk ho país 22 seluk sai observadór hodi akompaña prosesu no kumpre rekezitu hodi sai membru hanesan ho nasaun 164 sira seluk.

Hanesan país observadór, Governu estabelese grupu traballu ba OMK hanesan komité traballu hodi halo preparasaun, negosiasaun, prienxe rekezitu no tuir enkontru koordenasaun ho Estadu membru.

Adezaun ba organizasaun mundiál ne’e ho hanoin ida katak Governu bele halo parseria ho setór privadu nasionál no internasionál atu loke kampu traballu ba timor-oan.

OMK hanesan organizasaun ne’ebé regula komérsiu entre país sira ho objetivu atu garante katak atividade komersiál hotu la’o ho forma fasil, livre, previzível no posível.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here