Seremónia entrega livru ba MEJD hodi responde ba prosesu aprendizajen durante pandemia COVID-19, iha salaun enkontru MEJD, segunda (25/10). Imajen TATOLI/Francisco Sony

DILI, 25 outubru 2021 (TATOLI)—Governu Koreia liuhosi Ajénsia Kooperasaun Internasionál Koreia (KOICA, sigla inglés) atribui livru matemátika no siénsia hamutuk 90.108 ba estudante 3º siklu ensinu báziku iha territóriu tomak no orsamentu millaun $2,4 hodi aselera programa sistema nasionál transmisaun edukasionál iha Timor-Leste.

Programa post-projetu ne’e sei implementa hosi United Nations Educational, Scientific and Cultural Organization (UNESCO), ne’ebé entrega ba ba Ministériu Edukasaun, Juventude no Desportu (MEJD) hodi distribui ba estudante sira.

Ministru Edukasaun, Juventude no Desportu, Armindo Maia. Imajen TATOLI/Francisco Sony

Biban ne’e, Ministru Edukasaun Juventude no Desportu, Armindo Maia, agradese ba Governu Koreia, ba apoiu ne’ebé kontinua fó ba Timor-Leste iha área edukasaun no konsidera importante tebes.

“Livru ne’e atu tulun estudante bele hatene matemátika no siénsia. Maski ho situasaun COVID-19, ne’ebé bainhira Governu suspende atividade letiva ba eskola sira, ne’ebé tama iha sistema emerjénsia konfinamentu obrigatóriu no serka sanitária, Governu Timor-Leste liuhosi Ministériu Edukasaun seidauk prodús livru gratuita ba estudante sira atu estuda iha uma,” Ministru Armindo Maia, hateten, iha salaun enkontru MEJD, Vila-verde, segunda ne’e.

Notísia relevante: UNESCO TL Realiza Kompetisaun Siénsia No Matemátika

Governante ne’e nota katak, programa ne’e atu tulun estudante sira labele lakon matéria tanba antes ne’e hela iha uma iha tempu naruk no atu responde ba situasaun pandemia ne’ebé mundu inklui Timor-Leste enfrenta.

“Ha’u-nia mandatu, iha mehi ida atu tau orsamentu ba item ne’e, atu labarik ida-idak bele hetan livru sufisiente hodi bele lori ba estuda iha uma,” nia akresenta.

Embaixadór Koreia iha Timor Leste, Kim Jeong Ho. Imajen TATOLI/Francisco Sonny

Iha fatin hanesan, Embaixadór Koreia iha Timor Leste, Kim Jeong Ho, hateten, programa post-projeitu ne’ebé KOICA oferese, hodi tulun estudante 3º siklu ensinu báziku iha Timor-Leste.

“Situasaun iha mundu ohin loron obriga ita atu ajusta ba sistema edukasaun iha mundu, tanba ne’e ami nafatin komprometidu apoiu Timor-Leste iha setór edukasaun iha programa eskola online, atu labarik sira labele lakon oportunidade estuda iha uma,” nia dehan.

Tuir planu, KOICA sei ajuda tan livru ba estudante sira iha tinan oin hodi bele estuda di’ak liután.

Tuir Diplomata koreanu ne’e, Koreia daudaun ne’e funu hasoru kiak, ne’ebé haree katak edukasaun hanesan save di’ak hodi suporta dezenvolvimentu ekonomia no sosiál, tanba COVID-19 halo estudante labele estuda iha eskola no lakon sira-nia motivasaun.

“Ho ami ninia esperiénsia rasik, maka Governu Koreia sei kontinua ninian kompromisu atu suporta hadi’a asesu ba edukasaun iha Timor-Leste atu estudante sira bele hetan filafali edukasaun adekuadu,” nia subliña.

UNESCO husu parseiru edukasaun kolabora garante aprendizajen iha Timor-Leste

Reprezentante UNESCO ba Timor-Leste iha Jakarta, Diretór Mohamed Djelid, kongratula no apresia ba inisiativa KOICA no MEJD, ne’ebé hanesan parseiru ba projetu ne’e.

“Parseiru hotu iha área edukasaun tenki serbisu hamutuk hodi garante kontinuasaun aprendizajen iha Timor-Leste, tanba pandemia COVID-19 sei sai dezafiu boot ba edukasaun, fó kauza ba eskola taka no afeta ba prosesu aprendizajen ne’ebe efetivu no kualidade. UNESCO sei kontinua suporta Governu Timor-Leste, atu nune’e prosesu aprendizajen sei la para,” Reprezentante UNESCO hateten via enkontru virtuál ho MEJD, KOICA no Embaixada Koreia iha Timor-Leste.

Nia dehan, daudaun UNESCO dezenvolve hela estuda ho distánsia liuhosi programa sistema nasionál transmisaun edukasionál (Education Broadcasting System), ne’ebé sei hafasil estudante asesu ba edukasaun ho gratuita no kualidade, ne’ebé sei halo transmisaun iha kanál televizaun sira.

Programa sistema nasionál transmisaun edukasionál ho objetivu atu haforsa kapasidade nasionál iha hanorin no estuda iha distánsia, ne’ebé hanesan parte ida hosi UNESCO ninia responde durante no hafoin COVID-19 ba kazu emerjénsia sira seluk iha futuru.

Apoiu hosi Governu Koreia no UNESCO bele kontribui ba dezenvolvimentu setór edukasaun iha Timor-Leste, ne’ebé hakarak labarik hotu bele hetan livru gratuita, atu nune’e ajuda dezenvolve sira nia-an bele sai labarik  matenek.

Estudante 3º siklu ensinu báziku hosi Eskola Bázika Sentrál (EBC, sigla portugés) 30 de Agostu, Denia da Cruz, agradese ba parte hotu ne’ebé apoia ona livru no haksolok tanba bele tulun sira uza livru hode lee iha tempu deskansa iha uma.

“Ksolok tebes mai ha’u bainhira simu livru ezersísiu siénsia fízika-naturál, ne’ebé hanesan referénsia foun atu ajuda ha’u estuda di’ak liután no hosi livru ne’e ha’u bele halo ezersísiu kona-ba siénsia,” nia dehan.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here