Komandante Polísia Tránzitu Munisípiu Bobonaro, Sarjentu Xefe José Bere Soares. Imajen TATOLI/Sérgio da Cruz.

BOBONARO,25 outubro 2021 (TATOLI) — Komandu Polísia munisípiu Bobonaro liuhosi seksaun Polísia Tránzitu rejista kazu asidente tráfegu hamutuk 13 iha fulan-agostu to’o outubru tinan ida-ne’e.

“Iha fulan-agostu kazu tolu, setembru tolu no outubru mak hitu hamutuk kazu 13. Enkuantu sura hosi fulan-janeiru mai to’o agora ita rejista asidente tráfegu totál kazu 50,” Komandante tránzitu Bobonaro, Sarjentu Xefe, José Berre Soares, ko’alia iha Maliana, segunda ne’e.

Hosi kazu ne’e, iha fulan-agostu rejista motorizada xoke malu rua, motorizada xoke karreta ida. Nune’e mós iha setembru kazu motorizada iha rua no karreta ho karreta ida.

Iha fulan-outubru kazu asidente motorizada hamutuk lima, motorizada xoke ema la’o-ain ida, karreta ho karreta ida no asidente karreta governu ida no motorizada ida.

“Hosi asidente ne’e ita la rejista ema mate, iha mak kanek todan rua no kmaan rua, setembru kanek kmaan neen no outubru kazu todan laiha,” komandante ne’e esplika.

Nune’e komandante ne’e sujere ba utente roduviáriu sira, atu nafatin disiplina no kumpre regra kódigu estrada nian, bainhira atu halo viajen ba fatin ruma tenke halai ho velosidade natoon.

“Ami mós nafatin halo sosializasaun liu hosi ami-nia aktividade kontrola movimentu dadeersan atu ita-nia komunidade sira bele kompriende, oinsá bele salva ita-nia vida bainhira konduz motorizada ho karreta iha luron públiku sira,” nia fo hanoin.

Entretantu, hahú iha fulan-agostu to’o semtembru 2021 tránzitu munisípiu Bobonaro kontribui reseita ba kofre estadu hamutuk rihun $1,488, enkuantu fulan-outubru nia seidauk halo rekapitulasaun.

Nune’e mós reseita hirak-ne’e rekolla hosi infratór hamutuk 73 liuhosi atividade kontrola movimentu diária iha lurón públiku kapitál Maliana.

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here