Komandante PNTL Munisípiu Bobonaro, Superintendente Antoninho Mauluta. Imajen TATOLI/Sérgio da Cruz.

BOBONARO,25 outubro 2021 (TATOLI) — Komandu Polísia Nasionál Timor-Leste (PNTL) Munisípiu Bobonaro, sei garante seguransa ho másimu iha selebrasaun loron Finadu ne’ebé monu iha loron 2 novembru.

“Ha’u orienta ona parte operasaun ba iha eskuadra sira, bainhira membru sira halo movimentu iha dalan-ninin no semitériu sira mak ita identifika ema balu hemu-tua lanu, ita sei la husu tán, foti nonok de’it lori sira mai sela, depois tua mós tiha mak ita presta deklarasaun hotu mak foin bele fila,” Komandante PNTL Bobonaro, Superientendente Antoninho Mauluta ko’alia iha Maliana, segunda ne’e.

Loron finadu nu’udar tradisaun sarani Katólika nian, ne’ebé família sira atu ba presta sentimentu triste ba metebian sira-ne’ebé lakon iha sira-nia leet durante tinan barak.

Komandu PNTL munisípiu Bobonaro prepara ona membru efetivu 150 atu halo operasaun iha selebrasaun finadu ne’e nune’e garante seguransa iha fatin sira-ne’ebé risku ba konflitu.

“Ha’u orienta ona komandante operasaun koordena BOP no COE, atu tama iha finadu hotu-hotu kontrola semitériu ne’ebé ita identifika katak tinan hirak liubá sempre hamoru problema, ne’e ita Evita,” nia katak.

Nune’e mós orienta ona Ofisiál Polísia Suku (OPS) sira sei mantein iha idak-idak nia suku nune’e akompaña to’o selebrasaun ne’e la’o ho seguru.

Komandante ne’e apela ba transporte públiku sira katak bainhira tula pasajeiru sira tenke haree ba kapasidade veíkulu, hodi  evita akontese asidente tráfegu.

Jornalista            : Sérgio da Cruz

Editor                  : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here