Prezidente autoridade RAEOA, Arsénio Paixão Bano, inaugura projetu perfurasaun sistema bee-moos iha suku Cunha. Imajen TATOLI/Abílio Elo Nini.

OÉ-CUSSE, 25 outubru 2021 (TATOLI)— Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, segunda, inaugura projetu perfurasaun sistema bee-moos iha bairru Sonamnasi, aldeia Noafafo, suku Cunha, sub-rejiaun Pante Makasar.

“Ohin, ha’u kontente tanba projetu perfurasaun bee-moos unidade-20, ohin halo inauguarasaun dahuluk iha povu suku Cunha, estudante sira ba futuru sei la susar ona ba bee-moos, inan-aman sira, sei la susar ona, ha’u kontente tanba mehi autoridade RAEOA, hahú prepara kondisaun ba jerasaun futuru labele hetan krize bee-moos,” Arsénio Paixão Bano ko’alia iha inaugurasaun ne’e.

Nia subliña, autoridade harii fasilidade bee-moos ne’e laiha intensaun polítika ka la hili kór partidu, maibé importante povu suku Cunha asesu bee-moos.

Tanba ne’e, iha tinan 2021 autoridade RAEOA konsege halo projetu kada setór sira kauze to’o 100, hahú hosi bee-moos, gabiaun, edukasaun, saúde, estrada rurál no seluk-tán.

Prezidente Autoridade ne’e enkoraja komunidade iha bairru Sonamnasi atu tau-matan ba fasilidade foun ne’e, nune’e uza to’o tempu naruk.

Xefe suku Cunha, Domingos Seco Caunan, agradese ba autoridade RAEOA, tanba iha aldeia Sonamnasi durante tinan barak konsumu de’it bee-mota no maioria uza bee-posu maibé tempu bailoron komesa maran.

“Ami agradese tanba tinan 2021 ne’e autoridade tulun ona ami iha fatin ne’e, ami hamutk ho komunidade kontente nune’e ba oin ami sei la susar ona ba bee-moos,” lidér lokál ne’e agradese

Entretantu medida ba tanki bee distribuisaun nian hamutuk metru 5×10, ho nia volume bee 100 mill litru, sei rezolve família uma kain 187 ho totál abitante na’in 850 iha bairru Sonamnasi.

Kontrusaun perfurasaun ba sistema bee-moos ne’e ezekuta hosi empreza lokál Nun-Mabun Unipesoál, Lda, ho valór kontratu $156,325.73, ne’ebé aloka hosi Orsamentu Jerál Estadu (OJE) 2021 ho durasaun servisu fulan-haat no estende-tan fulan-haat maibé oras ne’e finaliza ona.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here