Komunidade rona esplikasaun kona-ba lei nasionalidade no bens imovel hosi Vise-Ministériu Justis, José Edmundo Caetano, Imajen Tatoli/Celestina Teles.

COVALIMA, 25 outubru 2021 (Tatoli)—Vise-Ministru Justisa, José Edmundo Caetano, hamutuk ho nia ekipa halo divulgasaun lei tolu ba komunidade iha suku Ogues, postu administrativu Maucatar, munisípiu Covalima. 

Nia hateten, lei tolu ne’e mak lei númeru 13/2017 Rejime Espesiál ba Definisaun Titularidade Beins Imóvel, lei númeru 8/2017 kona-ba Espropriasaun ba Utilidade Públika no lei númeru 9/2002 kona-ba nasionalidade.

“Lei ne’ebè ita-nia parlamentu nasionál aprova ona no hetan ona promulgasaun hosi Prezidente Repúblika maibé ita-nia sosiedade seidauk iha kuñesementu kona-ba lei tolu ne’e, entaun tenke divulga ba komunidade atu hatene” Vise-Ministru Justisa ne’e hateten ba jornalista sira, iha sede suku Ogues, segunda ne’e. 

Lei númeruu 9/2002 kona-ba nasionalidade, la permite atu aprova ema ho nasionalidade la’os timorense ne’ebé hakarak sai sidadauun Timor-Leste tenke prenxe rekizitu tenke hela iha Timor-Leste durante tinan lima no pasa iha ezame nasionalidade.

Iha lei númeru 8/2017 kona-ba Espropriasaun ba Utilidade Públiku no lei númeru 13/2017 kona-ba Rejime Espesiál ba Definisaun Titularidade Beins Imovel la autoriza ba sidadaun estranjeiru atu reklama beins imovel ne’ebé sira husik hela iha Timor-Leste bainhira akontese referendu 1999 no Kolonializasaun Portugés.

Tuir definisaun lei rua ne’e hateten, beins imovel estadu Portugés ne’ebé husik hela to’o loron 07 dezembru 1975 no Estadu Indonézia husik hela to’o 09 Outubru 1999 automatikamente tama ona iha propriedade Estadu Timor-Leste nian.

Durante iha divulgasaun lei ne’e, komunidade sira hato’o preokupasaun barak liu mak kona-ba nasionalidade, tanba sidadaun balun kaben ho sidadaun etranjeiru atu sai sidadaun Timor-Leste maibé tenke prenxe rekezitu legal mak tenke hatene kultura Timor, dalen, istória Timor-Leste, no tuir ezame bele pasa hodi bele sai sidadaun Timor. 

Reprezentante Administradór Postu Administrativu Maucatar, Adriana da Costa, hateten durante ne’e komunidade sira enfrenta kona-ba problema rai barak duni iha munisípiu Covalima. 

“Ita koalia kona-ba lei ami iha problema mak hanesan rai abandonadu, rai okupasaun, baliza komunidade entre komunidade, ami-nia postu administrativu sidadaun balun kaben ho sidadaun Indonézia, sira balun sai ona sidadaun Timor no balun seidauk tanba balun seidauk iha sertidaun RDTL no eleitorál,” nia dehan.

Postu Administrativu Maucatar kompsotu hosi Suku Belekasak, Ogues, Holpilat no suku Matai 

Jornalista : Celestina Teles

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here