Kondisaun motor ne'ebe matebian Carmonisio Soares uza. imajen/ Hortencio Sanchez

LIQUIÇA, 25 outubru 2021 (TATOLI)–Komandu Polísia Nasionál Timor-Leste (PNTL), Munisípiu Liquiçá, transporta ona mate-isin Carmonisio Soares, hosi Munisípiu Liquiçá, mai iha Hospitál Nasonál Guido Valadares (HNGV) atu halo autópsia.

Tuir kronolojia ne’ebé haktuir hosi matebian nia kolega, Lino Salvador da Piedade, katak iha domingu (24/10), sira hemu hamutuk tua ho nia kolega estajiáriu-sira hosi departamentu Saúde Públika, Universidade de Páz (UNPAZ), iha fatin estájiu sede suku Maumeta, Bazartete, Munisípiu Liquiça.

“Ami tuur hemu hela, maibé kolega matebian ne’e impresta ha’u nia motór iha tuku 12:00, kalan, atu bá Dili hodi haree ferik-oan. Ami nuudar nia kolega estájiu husu atu nia (matebian) labele ba, maibé matebian ulun moruk ba de’it. Dader ami rona nia monu no mate hela iha área Pilila, suku Lauhata, Bazartete,” Kolega Matebian Lino, hateten, ba Agência TATOLI, segunda ne’e.

Mate-isin Carmonisio Soares . imajen/ espesial

Komunidade iha área Pilila maka hetan matebian ho ulun fatuk nakfera, iha dadersan tuku 6:00,hosi Estrada ba área tasi ibun kuaze metru 20-resin.

Enkuantu, matebian  Carmonisio Soares, hosi munisípiu Viqueque ne’e, ho motór marka Beat ho númeru matríkula N-0058.

“Ita nia komunidade hetan kolega nia mate isin tuku 6:00, dader, Polisia Munisípiu Liquiça deside lori ba Dili iha tuku 7:50, dader ne’e, atu halo outópsia iha HNGV. Agora ita hamutuk hein prosesu autópsia,” Kolega matebian ne’e afirma ho mata-been.

Matebian ho nia kolega hamutuk 30 hosi departamentu saúde Públika hosi Universiade de Páz, hala’o estájiu durante fulan rua ona iha Suku Maumeta, postu administrativu Bazartete, munisípiu Liquiça.

PNTL munisípiu Liquiça deside transporta mate-isin, mai iha HNGV atu halo outópsia tanba matebian hetan asidente trágefu, maibé kondisaun motór di’ak hela.

Daudaun ne’e, Komandu PNTL munisípiu Liquiça mós kontinua halo investigasaun hodi  hein prosesu autópsia.

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here