Brigadeiru Jenerál Cornelio Ximenes “Maunana” akompaña Komandante Komponente Forsa Navál, Kapitaun Fragata João da Silva, hasai foto hamutuk ho membru promovidu-sira. Imajen TATOLI/ Natalino Costa.

DILI,25 outubru 2021 (TATOLI)—  Komadante Komponente Navál, FALINTIL Forsa Defeza Timor-Leste (F-DTL), Kapitaun Fragata João da Silva, hateten, presiza ró ho kapasidade boot atu halo operasaun hodi asegura no kontrola fronteira tasi liuliu riku-soin sira.

“Ami hasoru difikuldade tanba ró rua hanesan Jaco no Betano hanesan meiu ho klase Shanghai ne’ebé Governu hola hosi Xina, desde 2015 to’o agora sofre manutensaun ka avaria,” Kapitaun Fragata ne’e, hateten, ba jornalista sira iha Hera, segunda ne’e.

Notísia Relevante: Komandu F-FDTL halo promosaun diviza ba membru Komponente Navál na’in-24

Maski, ró rua ne’e avaria, maibé kontinua halo operasaun ki’ik iha tasi laran hodi hein Governu atu deside halo manutensaun.

Daudaun, Komponente Navál kontinua halo patrollamentu kosteira hanesan Hera ba Atauro, Manututo no Liquiça, maibé ba kosta súl ka tasi mane labele tanba seidauk iha ró.

Timor-Leste estabelesidu ona fronteira maritima ho Austrália, maibé Komponente Navál seidauk iha meiu atu kontrola iha tasi mane.

Governu aseita ina doasaun ró patrolla boot hosi Austrália, maibé to’o iha tinan 2023, entaun sei implika ba rikusoin iha tasi laran no implikasaun mós ba investimentu, katak ema hakarak investe iha fatin ne’ebé seguru iha maran no mós tasi.

“Ami kontinua husu ba Governu atu toma atensaun bá kestaun tanba uza meiu ki’ik sira ne’e halo operasaun ba área tasi mane la sufisiente. Ita nuudar nasaun ukun aan ita tenke iha  kapsidade bele interven iha nivél rejionál entermus tasi no iha internasionál,” Komandante Komponente Navál ne’e sujere.

Notísia Relevante: Ró avaria difikulta UPM asegura rikusoin tasi

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here