Konsellu Estadu (KE) no Konsellu Superiór Defeza Seguransa (KSDS) enkontru ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, segunda (25/10). Imajen/Mídia PR.

DILI, 25 outubru 2021 (TATOLI)—Konsellu Estadu (KE) no Konsellu Superiór Defeza Seguransa (KSDS), segunda ne’e deside rekomenda ba Prezidente Repúblika, Francisco Guterres ‘Lú-Olo’ atu haruka karta ba Parlamentu Nasionál hodi halo estensaun ba Estadu Emerjénsia  (EE).

“Ohin, hafoin reuniaun konsellu rua diskute no deside hodi rekomenda ba Prezidente Repúblika atu hato’o pedidu estensaun Estadu Emerjénsia ba iha Parlamentu Nasionál hodi hetan autorizasaun,” Xefe Kaza Sivíl Prezidensia Repúblika, Fransisco Maria de Vasconcelos, hateten ba jornalista sira iha Palásiu Prezidensiál Nicolau Lobato, Bairru Pite, Dili.

Estensaun Estadu Emerjénsia no nia medida nafatin depende ba dezenvolvimentu virus maibé agora serka sanitária no konfinamentu obrigatóriu laiha. Ho estensaun Estadu Emerjénsia ne’e, oinsá halo protesaun evita virus no bainhira situasaun muda lalais, Governu mak halo dekretu hodi rezolve.

Iha tempu badak, nia hateten, Xefe Estadu sei hato’o pedidu estensaun Estadu Emerjénsia ba  Parlamentu Nasionál hodi deside.

Membu Konsellu Superiór Defeza Seguransa (KSDS), Prezidente Repúblika Rancisco Guterres Lú Olo, Primeiru-Ministru Taur Matan Ruak, Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno, Ministru Defeza Filomeno Paixão de Jesus, Ministru Justisa Manuel Cárceres da Costa.

Hosi Parlamentu Nasionál David Dias Ximenes, Abel Pires da Silva, Xefe Estadu Maiór Jenerál Falentil Forsa Defeza Timor-Leste (F-FDTL) Tenente Jenerál Lere Anan Timur, Komandante Jerál Polísia Nasionál Timor-Leste (PNTL) Komisáriu Faustino da Costa no Diretór Ezekutivu Fórum Organizasaun Naun Governamentál (FONGTIL) Daniel Santos do Carmo.

Enkuantu, membru Konsellu Estadu mak hanesan atál Prezidente Repúblika Francisco Guterres Lú-Olo, Primeiru-Ministru Taur Matan Ruak, Prezidente Parlamentu Nasionál, Aniceto Longuinhos Guterres Lopes, membru ne’ebé nomea hosi Prezidente Repúblika mak hanesan Prezidente Kámara Komérsiu Indústria Timor-Leste (CCI-TL, siglá portugés) Oscar Lima, Prezidente Komisaun Nasionál Eleisaun José Agostinho da Costa Belo no nomea hosi Parlamentu Nasionál mak hanesan Aurora Ximenes, José Cornelio Guterres, Arcánjelo de Jesus Gouveia Leite.

Tuir Sala situasaun Sentru Integradu Jestaun Krize (CIGC, silgá portugés), domingu (25/10) ne’e rejista kazu óbitu ida, pozitivu haat, rekuperadu sia (9) no kazu ativu 63.

No totál kumulativu kazu konfirmadu hahú hosi 21 marsu 2020 to’o 25 outubru 2021 hamutuk 19.770 no kazu óbitu 121.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here