\Pesoál saúde prepara vasina AstraZeneca hodi fó ba abitante, iha Sentru Saúde Comoro, segunda (25/10). Imajen TATOLI/António Gonçalves

DILI, 25 outubru 2021 (TATOLI)–Forum Organizasaun Naun Govermentál Timor-Leste (FONGTIL) destaka membru halo monitorizasaun iha munisípiu 12 no Rejiaun Administrativa Espesiál Oé-cusse Ambeno (RAEOA) ho objetivu garante partisipasan sidadaun no apoia Governu hadi’a prestasaun servisu iha vasinasaun.

“Kritériu jerál monitorizasaun hosi sentru vasinasaun 41, hatudu progresu di’ak tanba iha partisipasaun 79,49%, tanba ne’e presiza esforsu liután hodi hasa’e konsiénsia komunidade ba implementasaun asina. Kona-ba prosesu atendimentu pesoál saúde sira iha fasilidade saúde sira hatudu 80%,” Jestór Programa FONGTIL, Lourenço Tito, hateten liuhosi komferénsia imprensa, ne’ebé hala’o iha salaun enkontru FONGTIL, segunda ne’e.

Kona-ba preparasaun lojístiku no vasina iha fasilidade saúde iha 68,85%, apoiu líder komunitáriu sira ka parte relevante sira hodi hasa’e taxa partisipasaun vasina ema 83.615, hatudu katak iha entidade hirak ne’e serbisu maka’as hodi apoiu ba programa nasionál ne’e.

“Agora haree ba prespetiva komunidade ba fatin vasina ne’ebé seidauk iha asesibilidade no ijiene no kona-ba oinsá progresu no follow up ba rekomendasaun hosi monitorizasaun liubá, kona-ba apoiu no partisipasaun organizasaun sosiedade sivil, liliu membru FONGTIL hodi hasa’e taxa partisipasaun,” nia akresenta.

Iha períodu semana ne’e, iha loron 18 to’o 20 outubru 2021, partisipasaun komunidade ba vasina sa’e maka’as, ne’ebé diskobre abitante 5.640 mak partisipa iha vasina.

Rezultadu monitorizasaun ba fatin vasina iha munisípiu 11 no RAEOA hatudu taxa partisipasaun boot liu iha munisípiu Dili 18,28%, tuir fali mak Ermera 16,79%, Covalima 9,72%, no RAEOA ho 9,61%, Viqueque 9,41%, enkuantu iha munisípiu seluk iha semana ne’e taxa partisipasaun kiik liu kompara ho semana kotuk.

“Númeru komunidade atu simu vasina doze dahuluk barak liu, akontese iha munisípiu Ermera, Ainaro, Covalima, Viqueque no, kompara ho partisipasaun vasina doze daruak, barak liu iha munisípiu Dili, Baucau, Lautém, Manatuto, Bobonaro no RAEOA mak sa’e maka’as liu,” Jestór ne’e dehan.

Partisipasaun feto, mane no ema ho difisiénsia hatudu númeru laiha diferente, tantu iha vasina doze dahuluk no doze daruak. Ein jerál partisipasaun feto sa’e maka’as ho 49,73% kompara ho partisipasaun mane ho 46,26% no ema ho difisiénsia 0,17%, tanba semana ne’e númeru partisipasaun feto barak liu iha munsípiu Liquiçá, Viqueque, Ainaro, Manatuto no Lautém, nune’e Dili prienxe feto 497 ka 48,21%, hosi totál populasaun feto mak tuir vasina iha munisípiu Dili 18-20 outubru no kobre iha fatin monitorizasaun 41.

Iha sorin seluk partisipasaun ema ho difisiénsia hamutuk na’in-10 ho 0,18% mak partisipa, iha munisípiu Dili hetan tolu no Ainaro mak númeru a’as liu hamutuk na’in-hitu, ho ida-ne’e munisípiu Ainaro semana ne’e hatudu indikasaun pozitivu ba ema ho difisiénsia partisipa vasina, maski nune’e presiza fó atensaun nafatin liliu iha munisípiu sira seluk.

“Presiza kria kondisaun atu ema ho difisiénsia bele asesu vasina iha fatin hotu iha Timór laran tomak,” nia fó hanoin.

FONGTIL observa mós katak durante prezensa membru Governu iha munisípiu, taxa partisipasaun sa’e tanba komunidade partisipa iha atividade ne’e barak kompara ho antes.

“Hafoin prezensa membru Governu iha munisípiu, haree katak taxa partisipasaun sa’e, relatóriu antes hatudu katak Ermera persentajen vasina menus, maibé ho prezensa Xefe Governu haree katak persentajen ne’e sa’e, signifika katak ho prezensa Governu iha terrenu hosi ami-nia relatóriu hatudu persentajen vasinasaun doze dahuluk iha Ermera sa’e,” nia tenik.

Notísia relevante: Membru Governu sensibiliza kampaña vasinasaun iha munisípiu to’o 30 outubru

Vasina ne’ebé fó ona ba populasaun elijível tinan 18 ba leten, to’o iha domingu (24/10), dadeer tuku 10:00 tuir sistema informasaun saúde iha Ministériu Saúde, hatudu katak vasina iha Timor-Leste doze dahuluk atinje 70,8% doze daruak 46%.

Tuir kedas mak munisípiu Covalima doze dahuluk 86,4% no doze daruak 54,9%, Viqueque doze dahuluk 86,2% no doze daruak 53,8%, Dili doze dahuluk 80,8% no doze daruak 72,4%, RAEOA doze dahuluk 79,5% no doze daruak 51,9%.

Baucau doze dahuluk 76,7% no doze daruak 45,4%, Manatuto doze dahuluk 71,9%, no doze daruak 33,4%, Manufahi doze dahuluk 69,8% no doze daruak 30,3%, Aileu doze dahuluk 61,6% no doze daruak 24,3%, Lautém doze dahuluk 61,2% no doze daruak 32,5%, Liquiçá doze dahuluk 55,7% no doze daruak 29,1%, Bobonaro doze dahuluk 55,2% no doze daruak 30,4%, Ainaro doze dahuluk 53,2% no doze daruak 20,0%, no Ermera doze dahuluk 52,3% no doze daruak 20,0%.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here