Grupu Agrikultór sira promove produtu lokál, segunda (25/10). Imajen TATOLI/Natalino Belo.

BAUCAU, 25 outubru 2021 (TATOLI) — Feira produtu lokál ne’ebé organiza hosi autoridade munisípiu Baucau fó motivasaun ba grupu agrikultór sira hasa’e produsaun agríkola.

Reprezentante Prezidente Autoridade Munisípiu Baucau atuál Sekretáriu Autoridade Munisipál, Simão dos Santos Marques Pinheiro, esplika diploma ministeriál númeru 48 fó kompeténsia ba autoridade munisípiu estabelese diresaun seguransa alimentár ne’ebé mak atu reforsa grupu agrikultór sira iha munisípiu refere.

“Importánsia hosi feira refere mak atu promove grupu agrikultór sira hodi hasa’e produsaun no asegura ho reforsa ai-han,” Sekretáriu Munisípal ne’e ko’alia iha ámbitu selebrasaun loron mundiál ai-han, iha Sentru Konvensaun Baucau (CCB, sigla Portugés), segunda e’e.

Reprezentante Ministru Agrikultura no Peska (MAP), Inspetór Jerál Octávio da Costa Monteiro de Almeida, agradese ba autoridade munisipál Baucau no parseiru dezenvolvimentu sira-ne’ebé iha inisiativa loke feira refere.

“Hein katak grupu agrikultór sira hafoin partisipa iha feira ne’e bele kontinua nafatin produsaun nune’e oferese iha merkadu hodi hasa’e rendimentu ekonomia,” Octávio hateten.

Governu liuhosi MAP esforsa atu kontinua investe iha área agrikultura hanesan infraestrutura irrigasaun, fó apoia ba grupu agrikultór liuhosi parseiru dezenvolvimentu sira iha área rurál atu halo produsaun nune’e lori ba merkadu hodi sustenta ekonomia rai-laran.

Reprezentante MAP, Inspetór Jerál Octávio da Costa Monteiro de Almeida hamutuk ho Sekretáriu Munisípal, Simão dos Santos Marques Pinheiro, vizita stand feira produtu lokál iha CCB, segunda (25/10). Imajen TATOLI/Natalino Belo.

“Agrikultura parte integrante ida importante iha ita-nia país ne’ebé kompostu hosi kuaze 75% agrikultura sira liuhosi dadus sensus agríkola,” Octávio akresenta.

Entretantu, grupu agrikultór Koli hosi postu administrativu Venilale, Simão Januário da Costa, aprezenta produtu ai-han sira hanesan liis-mean, liis-mutin, bombai lokál, ai-lia, batar, fehuk, talas no foos rai-mutin no mean.

“Sente haksolok tebes tanba liuhosi expozisaun ne’e, espera bele motiva ami atu hasa’e no promove ami-nia produtu barak ho di’ak liután,” Simão argumenta.

Atividade refere realiza durante loron rua ne’e, hanesan realiza karavana hodi simu komitiva MAP, abertura feira no kompetisaun pintura hosi estudante eskola báziku hosi postu administrativu neen iha Baucau.

Tema importante hosi feira mal “Hamutuk ita kuda” Haburas no promove produtu lokál hodi sustenta ai-han saudável ba Baucau oan hotu iha futuru.

Maske loron mundiál ai-han ne’e monu iha loron 16 outubru liu ona maibé autoridade munisípiu Baucau fó opurtunidade ba grupu agrikultór sira promove sira-nia produtu liuhosi atividade feira durante loron rua ne’e.

Partisipante sira mai hosi grupu agrikultór hamutuk neen hamutuk stand ualu (8) hosi postu administrativu neen (6) ne’ebé halo kooperasaun ho diresaun agrikultura munisípiu hamutuk ho parseiru dezenvolvimentu sira hanesan CARITAS, Catholic Relief Services (CRS) no World Vision.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here