Misaun Exploratóriu Eleitorál hosi Uniaun Europeia hala'o enkontru ho ekipa Komisaun Nasionál Elisaun (CNE-Sigla Portugés) hodi diskute kona-ba prosesu preparativus eleisaun Prezidensiál tinan 2022 iha salaun CNE, Caicoli, Dili, segunda (25/10). Imajen Tatoli/Francisco Sony.

DILI, 25 outubru 2021 (TATOLI)—Komisaun Nasionál Eleisaun (CNE, sigla portugés), segunda ne’e simu delegasaun Misaun Observasaun Eleitorál Uniaun Europeia hodi diskute kona-ba Eleisaun Prezidensiál 2022 iha Timor-Leste.

Notísia Relevante: Eleisaun prezidensiál 2022: Sentru votasaun 1200 no paralelu tolu

Prezidente Komisaun Nasionál Eleisaun, (CNE, siglá portugés), José Agostino da Costa Belo. Imajen Tatoli/Francisco Sony.

“Pedidu ne’e mai hosi Governu Timor-Leste oinsá aban-bainrua sira mós mai halo observasaun ba ita-nia eleisaun prezidensiál. Iha enkontru ne’e, delegasaun UE mai atu hatene de’it kona-ba ita nia preparasaun ba eleisaun prezidensiál 2022 no mudansa lei eleitorál ba Prezidente Repúblika no kondisaun atuál,” Prezidente CNE, José Agostinho da Costa Belo, hateten ba jornalista sira hafoin ramata hala’o sorumutu ho delegasaun Misaun Observasaun Eleitorál UE, iha salaun enkontru CNE, Caicoli, segunda ne’e.

Hosi situasaun sira-ne’ebé Misaun Observadór Eleitorál UE hetan, sira sei halo fila-fali relatóriu ba nivél altu iha UE nian mak sei deside, saida mak UE bele fó apoiu ba Timor-Leste hanesan fó observadór, asesór legál no sira seluk.

Misaun UE interesante no prontu apoiu Timor-Leste hodi fó susesu ba eleisaun prezidensiál 2022, ne’ebé garante la’o ho imparsiál no demokrátiku.

“Durante ne’e ita servisu ho entidade no parseiru internasionál hotu hodi hala’o eleisaun, no kontinua servisu hamutuk hodi hala’o eleisaun ne’ebé di’ak ba demokrásia no sai ezemplu ba nasaun sira seluk,” nia dehan,

Durante sorumutu, ekipa UE hakarak rona no haree besik liután CNE nu’udar orgaun eleitorál ba supervizaun aktu eleitorál ninia preparasaun no dezáfiu ba Eleisaun Prezidensiál 2022.

Prezidente CNE ne’e informa, preparasaun sire-ne’ebé hala’o mak hanesan CNE servisu hamutuk ho STAE lansa ona resensiamentu eleitorál iha fulan hirak liu-bá, no daudaun ne’e la’o hela iha territóriu nasionál no diáspora.

Nune’e mós, CNE halo hela edukasaun sívika iha territóriu nasionál ho objetivu halo sensivilizasaun ba sidadaun sira kona-ba importánsia eleisaun, oinsá populasaun sira-nia partisipasaun atu bele partisipa no kontribui iha eleisaun ne’ebé mai.

Preparasaun seluk, iha fulan hirak liu-bá, CNE ho UNDP organiza ona semináriu hodi ko’alia kona-ba eleisaun reziliente iha COVID-19 ba preparasaun saida mak halo iha períodu situasaun atuál no senáriu piór, nune’e mós halo reuniaun virtuál ho membru nasaun CPLP no nasaun sira seluk ko’alia kona-ba situasaun pandemia COVID-19 iha eleisaun.

Nia informa, iha alterasaun lei eleitorál ba Prezidente Repúblika hodi aumenta sentru votasaun atu bele fasilita sidadaun asesu besik liután no sentru votasaun paralelu iha Dili, ho objetivu atu bele fasilita estudante sira iha kapitál Dili la presiza fila-fali ba ida-idak nia munisipiu hodi fasilita vota de’it iha Dili.

Tuir konstituisaun, eleisaun prezidensiál ne’e hala’o periodika kada tinan lima (5) no CNE hanesan orgaun eleitorál hodi halo supervizasaun ba prosesu eleitorál hotu.

“Ami hala’o hela preparasaun sira ba eleisaun prezidensiál no ami preparadu ona,” nia dehan.

Tuir kalkulu CNE nian iha fulan janeiru 2022, inísiu primeiru semana, Prezidente Repúblika bele dekreta ona kalendáriu eleisaun prezidensiál, nune’e iha loron 19 marsu 2022 bele hahú realiza eleisaun prezidensiál.

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here