Prezidente RFTL, Adão do Carmo de Jesus. Imajen Tatoli/Nelson de Sousa.

DILI, 23 outubru 2021 (TATOLI)—Organizasaun Roman Foinsa’e Timor-Leste (RFTL), sábadu ne’e realiza kongresu dahuluk atu formaliza an no atu rejistu iha Servisu Rejistu Notariadu sai organizasaun legál iha Timor-Leste.

“Objetivu hosi kongresu ne’e mak primeiru atu fó tomada pose ba membru sira, diskusaun aprovasaun rejimentu, estatutu, eleze estrutura organizasaun nian atu nune’e bele prenxe rekezitu ba rejistu sai organizasaun legál iha notariadu,” Prezidente RFTL, Adão do Carmo de Jesus, hateten ba jornalista sira iha edifísiu salaun Ministériu Solidariedade Sosiál no Inkluzaun (MSSI), Caicoli, Dili.

Organizasaun Roman Foinsa’e Timor-Leste (RFTL), sábadu ne’e realiza kongresu dahuluk. Imajen Tatoli/Nelson de Sousa.

RFTL harii iha mahein Na’in Feto Ramelau nia oin iha loron 30 fulan-juñu 2019 hosi foinsa’e na’in-22 ho nia lema ‘Roman hahú hosi ha’u hodi haklaken lia-loos’ no nia vizaun mak sai foinsa’e ida-ne’ebé sai roman hodi kontribui ba estabilidade no dezenvolvimentu nasionál.

“Vizaun ne’e ami foti liga ho naran organizasaun ne’ebé foti iha bíblia sagrada iha São Mateus kapitulu lima versíkulu 14 hateten, ‘Imi mak roman mundu nian’. Entaun ami-nia vizaun katak foinsa’e Timor-Leste tenke sai roman no modelu hodi kontribui estabilidade,” nia hateten.

Durante ne’e, organizasaun ne’e hanesan movimentu ida no seida’uk hetan legalidade hala’o nia atividade tolu mak dahuluk foku ba fiar nian hodi koordena ho parte relijiozu sira fó oratóriu ho reflesaun ba foinsa’e sira.

Daruak, edukasaun sosiál kontribui ba sosiedade iha saida de’it liu-liu formasaun ba lideransa ne’ebé movimentu organizasaun rasik oferese no mós bolu organizasaun seluk bele fó formasaun ba membru sira.

Datoluk, asaun karidade ne’ebé durante ne’e hamutuk ho Forum Karidade Timor-Leste, Konferénsia Epsikopál no organizasaun sira seluk konstrui ona uma ba ema kbiit laek ka família ne’ebé presiza tulun hanesan iha munisípiu Aileu, Dili iha Aitarak Laran no Bebonuk.

“Fundu sira-ne’e balun hosi estrutura ho membru no balun hetan apoiu hosi ami-nia konsilleiru másimu, doadór instituisaun privadu no Governu,” nia dehan.

Entertantu, kongresu ne’e hala’o durante loron rua 23-24 outubru 2021 ne’ebé partisipa hosi kongresista sira hosi membru eventuál no membru fundadór ema120-resin.

Jornalista : Nelson de Sousa

Editór       : Cancio  Ximenes

PUBLISIDADEiklan

HAKEREK NO HATÁN

Please enter your comment!
Please enter your name here