Estudante Sekundariu Jerál 04 setembru, UNAMET, Dili. Imajen Tatoli/Dok.

DILI, 23 outubru 2021 (TATOLI)—Ekipa Programa Promosaun Edukasaun Saúde hosi Ministériu Saúde Sentrál husu ba inan-aman sira atu foti desizaun hamutuk molok aseita oan sira idade 12-17 simu vasina Pfizer.

Notísia Relevante: SEMD indika eskola 4 setembru Balide sai fatin lansamentu vasina Pfizer

Ofisiál Programa promosaun edukasaun saúde, Bendonina dos Reis relata asuntu ne’e ba inan aman estudante sira iha kampañia advokasia vasinasaun Pfizer ne’ebé hala’o iha Ensinu Sekundáriu Jerál (ESJ) 4 Setembru UNAMET, Balide, Dili, sábadu ne’e.

“Inan-aman aseita ne’e importante tebes. Tanba ne’e, parte saúde prepara ona formuláriu atu família estudante sira tenke prenxe molok oan sira simu vasina Pfizer. Fformuláriu ne’e atu ajuda inan-aman sira bele esplika kondisaun saúde oan sira-nian. Karik oan sira iha kondisaun moras, sofre kurasaun ka isin manas labele simu vasina. Nune’e, inan-aman sira balun la prontu atu prinxe formuláriu, automatikamente oan sira sei labele simu vasina,” nia dehan.

Bainhira vasinasaun hahú, família sira-ne’ebé deside ona vasinasaun ba oan sira tenke submete formuláriu iha momentu vasinasaun. Tenke prenxe oan sira-nia estatus ho loloos atu parte saúde bele identifika tuir dadus sira-ne’e.

Ofisiál MS ne’e hateten, dalan ida di’ak ba inan-aman sira atu halo mak tenke informa ba malu. se ohin inan ka aman de’it mak tuir enkontru tenke husu opiniaun ba malu kona-ba formuláriu refere atu loron ikus mosu problema ruma labele fó sala ba malu.

Diretór Ensinu Sekundáriu Jerál (ESJ) 4 Setembru UNAMET Balide, Sergio da Cruz iha esperansa boot ba inan-aman sira atu deside asaun ruma di’ak ba oan sira-nia saúde no futuru.

“Ha’u fiar inan-aman sira bele prinxe hotu formuláriu hosi Ministériu Saudé, atu nune’e garante oan sira bele hetan hotu vasina Pfizer iha tempu besik,” nia dehan.

Nia lahaluha hato’o agradese ba inan-aman sira tanba bele simu konvite ne’ebé eskola hato’o liuhosi oan sira, ida-ne’e hatudu ona kolaborasaun no kooperasaun di’ak hodi divulga informasaun ba malu kona-ba vasina Pfizer ba oan sira.

Tuir dadus hosi MEJD, ema ho idade 12 to’o 17 hamutuk 130.000 mak preparadu atu simu vasinasaun, ne’ebé hosi númeru ne’e, 100.000 hanesan estudante no 30.000 la’ós estudante.

Notísia Relevante: MS lansa vasina Pfizer doze dahuluk iha munisípiu Dili no Liquiça

Vasina Pfizer doze 100.620 hosi EUA to’o iha Dili

Jornalista  : Tomé Amado

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here