Grupu Arte Marsiál RAEOA hatudu atrasaun nu'udar kompromisiu hametin dame no unidade nasionál. Imajen Tatoli/Abílio Elo Nini.

OÉ-CUSSE, 23 outubru 2021 (TATOLI)—Grupu Arte Marsiál (GAM) iha Rejiaun Administrativa Espesiál Oé-Cusse Ambeno (RAEOA) ne’ebé kompostu hosi PSHT, IKS, KORKA no Taekwondo, sábadu ne’e hatudu atrasaun hamutuk nu’udar kompromisu konjunta atu hametin dame, estabilidade no unidade nasionál.

Notísia Relevante: KRAM halo re-ajustamentu ba estrutura organizasaun arte marsiál iha RAEOA

Prezidente Komisaun Reguladóra Arte Marsiál (KRAM) Timor-Leste, Octavio da Conçeição, ko’alia ho membru Grpu Arte Marsiál sira. Imajen Tatoli/Abílio Elo Nini.

“Ohin, imi hatudu imi-nia atrasaun ne’e, nu’udar kompromisiu dame malu entre imi, tanba arte marsiál nu’udar modalidade desportiva ida. Tanba ne’e, husu organizasaun hotu-hotu iha Oé-Cusse atu kria amizade nu’udar maun-alin, atu hametin pás no estabilidade hodi kontribui ba ita-nia dezenvolvimentu nasionál,” Prezidente Komisaun Reguladóra Arte Marsiál (KRAM), Octavio da Conçeição, hato’o lia hirak ne’e ba membru GAM sira iha kampu futeból Oé-Bau, Oé-Cusse.

Envolve an iha grupu arte marsiál tenke kuda metin kultura nu’udar Timor-oan, nu’udar Oé-Cusse oan no kuda metin imi-nia kultura iha imi-nia kakutak. Maske, organizasaun sira-ne’e mai hosi nasaun viziñu maibé imi tenke hatudu unidade hodi ba partisipa iha eventu internasionál no bele kompete ho di’akliu.

Hanesan PSHT no IKS ne’e, nia hateten, ninia doutrina mai hosi nasaun viziñu kahur ho nasaun Xina, bele aprende hosi sira maibé ita nafatin Timor-oan, nafatin maubere oan, tenke hatudu dixiplina bele kompete ho sira iha eventu internasionál hodi defende bandeira RDTL.

Daudaun ne’e, organizasaun PSHT mak submete ona sira-nia dokumentu atu hetan legalidade iha Ministériu Justisa, tanba ne’e IKS ho KORKA, Komisaun Reguladóra Arte Marsiál (KRAM) Timor-Leste, husu atu submete daudaun.

Notísia Relevante: PSHT kompleta ona rekezitu hosi KRAM

Grupu Arte Marsiál RAEOA hatudu atrasaun nu’udar kompromisiu hametin dame no unidade nasionál. Imajen Tatoli/Abílio Elo Nini.

Ho nune’e, iha futuru imi bele rekomenda atu loke ranting treinamentu no bele sa’e sintu iha rai laran de’it, maibé kuandu seidauk kompleta dokumentu no hetan legalidade, entaun seidauk bele rekomenda tanba IKS seidauk halo asembleia jerál estraordináriu.

Organizasaun arte marsiál tenke iha akta asembleia jerál tanba Ministériu Justisa iha Dirasaun Nasionál Servisu Notariadu ninia servisu ne’e, hakarak ka lakohi tenke iha akta asembleia extraordinariu.

“Organizasaun KORKA nian kompletu ona, falta de’it fundadór na’in-10 sira-nia dokumentu seidauk entrega ba KRAM,” nia dehan.

Governu liuhosi SEJD oferese nia tempu tomak atu dezenvolve arte marsiál iha Timor-Leste, tanba tinan oin SEJD sei kria kompetisaun hosi nivél postu to’o Munisípiu, hosi munisipiu sei hakat ba festivál desportu iha nasionál.

“Maibé, nu’udar organizasaun arte marsiál tenke hatudu dixipliña iha sosiedade, rona edukasaun sivika hosi treinadór sira, tenke halo tuir treinadór sira,” nia hateten.

Atividade atrasaun ne’e, hetan autorizasaun hosi Komisaun Reguladóra Arte Marsiál (KRAM) Timor-Leste, liuhosi Sekretáriu Estadu Juventude no Desportu (SEJD) hamutuk ho komandu Polísia Nasionál Timor Leste (PNTL) RAEOA, ho objetivu atu enkoraja grupu arte marsiál sira iha RAEOA atu kria amizade, unidade, pas no estabilidade hodi kontribui ba dezenvolvimentu nasionál

Notísia Relevante: PM Taur Orienta KRAM Halo Avaliasaun ba Grupu Arte Marsiál

Jornalista : Abílio Elo Nini

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here