Administradór munisípiu Viqueque, Januário Soares 'Boly'. Imajen TATOLI/Vitorino Lopes da Costa

VIQUEQUE, 22 outubru 2021 (TATOLI)—Administrasaun munisípiu Viqueque prevee $3.697.785 iha Orsamentu Jerál Estadu (OJE) tinan 2022, kompostu hosi saláriu no vensimentu $1.526.367, bens no servisu $742.150, kapitál dezenvolvimentu $258.568 no transferénsia públika $1.170.700 no laiha kapitál menór.

Tuir Administradór munisípiu Viqueque, Januário Soares ‘Boly’, antes ne’e administrasaun propoin millaun $7-resin, maibé hetan redusaun iha Komité Revizaun Orsamentu nível Polítika (KROP).

“Tuir loloos orsamentu ba tinan 2022 la to’o, maibé orsamentu balun ne’ebé aprova ona iha tinan 2012 hodi implementa projetu balun, balun paradu no balun paradeiru laiha, ne’ebé ami sei buka tuir projetu sira ne’e,” Autoridade munisipál ne’e informa ba Agência TATOLI, iha ninia knaar fatin, adiministrasaun Viqueque, sesta ne’e.

Tanba ne’e, liuhosi diskusaun ho Primeiru-Ministru, Taur Matan Ruak, orienta atu buka tuir projetu sira hosi tinan 2012 ne’ebé seidauk implementa tanba prevee orsamentu millaun $68.

“Viqueque tinan oin laiha orasamentu ba Planu Dezenvolvimentu Integradu Munisípiu (PDIM), maibé iha osan ba projetu reapropriasaun,” nia akresenta.

Nia dehan, programa prioridade ba munisípiu Viqueque maka hakarak dezenvolve setór saúde, agrikultura, infraestura ne’ebé ho relasaun estrada liga ba postu no suku sira.

“Haree ba tetu tinan oin, ami sente la sufisiente hodi aloka ba programa sira ne’ebé ami define ona ba tinan 2022,” nia tenik.

Ezekusaun OJE 2021 ba munisípiu Viqueque atinje ona 50%, ne’ebé tuir Administradór munisipál, daudaun iha faze implementasaun konstrusaun jardín no moru.

Orsamentu tinan 2022 ne’ebé prevee ba Viqueque hodi finansia servisu setorál no Sekretariadu Administrasaun Munisipál nian, ne’ebé prevee ba kustu merenda eskolar, alfabetizasaun, konsensaun eskolar millaun $1,1, no ba projetu reapropriasaun $258.500.

Alokasaun ba Programa Nasionál Dezenvolvimentu Suku (PNDS) hamutuk $547.400 ba suku 14, kompostu hosi atividade fíziku $467.500 no kustu operasionál hamutuk $79.000.

Enkuantu, alokasaun ba Uma Kbiit Laek (UKL) prevee millaun $1,1 ba suku 22 no Programa Movimentu Hafoun Aldeia (PMOHA) laiha.

Despeza Jerál munisípiu Viqueque ba ponte no estrada $49.023, dezenvolvimentu rurál no urbana $258.568, seguransa nasionál $30.636, asesu justisa $26.236, boa governasaun no jestaun institusionál $1.671.135, agrikultura $453.853, água no saneamentu $91.025, saúde $310.415, Edukasun no formasaun $732.022, igualdade jéneru no inkluzaun sosiál $46.736, no turizmu $28.136

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here