Reitor UNTL, João Martins hasai foto hamutuk partisipante sira iha semináriu diskute padraun kuríkulu nasionál iha área saúde. Imajen/mídia INFORDEPE

DILI, 22 outubru 2021 (TATOLI)— Universidade Nasionál Timor Lorosa’e (UNTL), sesta ne’e,realiza semináriu hodi diskute padraun kuríkulu nasionál ba ensinu superior iha área medisina, no siénsia saúde iha Timor-Leste.

Diretór Jerál Servisu Kooperativu Ministériu Saúde, hateten, iha nesesidade atu dezenvolve no uniformiza padraun kuríkulu nasionál iha área saúde atu garante kualidade rekursu umanu.

“Universidade sira iha timor laran barak mak iha fakuldade saúde, ne’ebé prodús profisionál saúde, maibé merkadu traballu limitadu. Nune’e presiza eleva kualidade atu bele compete iha merkadu rejionál no internasionál,” Diretór Jerál ne’e, hateten iha Institutu Nasionál ba Formasaun Dosente no Profisionál Edukasaun (INFORDEPE,sigla Portugés),  Balide, Dili.

Nune’e, Diretór Jerál husu ba Ministériu Ensinu Superiór, Siénsia no Kultura (MESSK) no dirijente Univesidade públika no privadu atu fó atensaun sériu hodi mellora kuríkulu nasionál.

Iha  biban hanesan, Reitor UNTL, João Martins, presiza duni kria padraun kuríkulu ba ensinu superior, kona-bá área medisina no siénsia saúde atu uniformiza no hanorin iha universidade sira.

“Ami hahú diskute atu halo padraun kurúkulu ida, atu Governu uza atu universidade hotu kumpre padraun.  Se implementa agora bele responde ita bele atinje nivél kualidad, maibé nafatin halo revizaun,” Reitór ne’e afirma.  ba jornalista sira hafoin konsulta kurikulu nasional ba ensinu superior iha area medisina siensia saúde iha Timor Leste iha Infodepe Balide ohin.

Daudaun laiha padraun, fó biban ba kada universidade buka rasik nia kuríkulu iha rai li’ur mai aplika, maibé ladauk haree ba kontestu nasaun nian.

Nune’e, João Martins husu governu liuhosi MESSK halo padraun kuríkulu ba área siénsia exata, agrikultura, enjeñeria, ekonomia, siénsia sosiál no seluk tan.

Governu liuhosi Ministériu Ensinu Superiór, Siénsia no Kultura, fó ona orientasaun ba instituisaun sira fó importansia kria padraun kuríkulu nasionál hodi mellora kualidade formasaun rekursu umanu iha nasaun ne’e.

Jornalista       : Felicidade Ximenes

Editór             : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here