Xefe suku Souro, postu administrativu Lospalos, munisípiu Lautém, Estevão da Costa Pereira. Imajen Agência TATOLI/Natalino Belo.

LAUTÉM, 21 outubru 2021 (TATOLI)— Progresu konstrusaun Uma Kbiit Laek (UKL) iha suku Souro, postu administrativu Losplaos, munisípiu Lautem atinje ona 75%.

Xefi suku Soru, postu administrativu Lospalos, Munisípiu Lautém, Estevão da Costa Pereira, informa uma-kain tolu mak hetan uluk Programa Dezenvolvementu Nasionál Suku-Uma Kbiit Laek (PNDS-UKL).

“Uma Kbiit Laek iha aldeia Foema’a atinje ona 75%, agora daudaun hahú taka kalen ona,” Xefi suku Soru informa ba Agência TATOLI iha Soru, sesta ne’e.

Antes konstrusaun lideransa lokál hamutuk ho ekipa tékniku PNDS identifika benefisiáriu no enkontru prosesu implementasaun iha fulan-agustu no hahú konstrusaun iha inísiu fulan-setembru ho durasaun serbisu fulan-tolu.

“Ami identifika inan-faluk ne’ebé iha oan rua ka tolu, observa sira-nia kondisaun tuir kritéria ne’ebé PNDS estabelese,” Estevão hateten.

Benefisiáriu na’in-tolu refere mak hanesan Alda Loi-ola, Victoria dos Santos, Rocina Pereira  ne’ebé benefísiu medida uma ho metru 42 no kada uma osan $17.000 totál $ 54.108.

“Ita-nia governu atuál haree duni situasaun povu nian tanba ne’e husu atu kontinua implementa tanba programa UKL kapás no direita ba povu,” Estevão komenta.

Suku rasik identifika ona total komunidade ne’ebé kategoria ba kbiit laek hamutuk uma-kain 136 ne’ebé presiza duni atensaun hosi governu liuhosi UKL.

Tuir dadus, benefísiariu iha munisípiu Lautém hamutuk 102 ne’ebé orsamentu hamutuk millaun $1.8, aloka ba atividade fíziku hamutuk millaun $ 1.7, kustu operasional $102.000 no fee ba BNCTL rihun $ 3.672.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here