Diretór Servisu Saúde Munisípiu Lautém, Anastacio da Cruz. Imajen Agência TATOLI/Natalino Belo.

LAUTÉM, 22 outubru 2021 (TATOLI) – Taxa partisipasaun komunidade iha munisípiu Lautém atinje 59,6% korresponde ho komunidade hamutuk 21.507 hosi totál alvu 36.418.

“Nível munisípiu Lautém iha alvu 36.418 ne’ebé atinje ona 59.6%. Signifika katak 21.507 partisipa ona vasinasaun, enkuantu komunidade ne’ebé seidauk vasina mak hamutuk 14.911,” Diretór Servisu Saúde Munisípiu Lautém, Anastacio da Cruz informa ba Agéncia TATOLI iha suku Souro, postu administrativu Lospalos, munisípiu Lautém, sesta ne’e.

Hosi númeru refere, Postu admistrativu Iliomar rasik sai primeiru lugár tanba atinje ona 77% korresponde ho 3.013 hosi totál komunidade 3.911.

Purtantu suku Mehara alvu hamutuk 2016 no vasina ona 1.471 (73%), postu administrativu Luro totál alvu hamutuk 3.935 no komunidade ne’ebé vasina ona hamutuk 2.723 (69%).

Entretantu, postu administrativu Lautém totál alvu hamutuk 8.988, komunidade ne’ebé vasina ona hamutuk 4.873 (54%) no postu administrativu Lospalos totál alvu hamutuk 17.563, komunidade ne’ebé partisipa ona vasina hamutuk 9.427 (54%).

“Hau fiar katak alvu ne’ebé fó hosi nasionál katak to’o 80% bele atinje to’o iha fulan-novembru ka dezembru,” Anastácio akresenta.

Iha sorin seluk, Administradór postu administrativu Tutuala, Albino de Araújo, hateten, taxa partisipasaun komunidade atinje ona 70%.

“Kominidade sira iha Tutuala simu ona doze primeiru liu ona  pursentu 50. Agora balun simu tán ona vasina doze daruak, ida-ne’e maka ita sura hamutuk maka atinje ona pursentu 70,” Administradór postu administrativu Tutuala ne’e informa.

Postu administrativu Tutuala iha suku rua, suku Tutuala no Mehara kompostu hosi aldeia hitu (7) ho totàl populasaun hamutuk 5.700.

Notísia relevante: PPN-SeKoms motiva komunidade Lospalos simu vasina

Jornalista         : Natalino Belo/Natalino Costa

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here