Konstrusaun ponte Bulobu, suku Ritabou, postu administrativu Maliana, munisípiu Bobonaro. Imajen Agência TATOLI /Sérgio da Cruz.

BOBONARO, 21 outubru 2021 (TATOLI) – Progresu konstrusaun ba ponte Bulobu ne’ebé lokaliza iha suku RItabou, postu administrativu Maliana, munisípiu Bobonaro atinje ona 90%.

Ponte ho naruk metru 100 no luan metru hitu ne’e responsabiliza hosi kompañia nasionál Nananyu Join Venture Adam Motor ho totál  orsamentu $2.860,755.63 hosi Orsamentu Jerál Estadu (OJE) 2017 nian.

Ponte Bulobu ne’e sei fasilita movimentasaun komunidade aldeia tolu kompostu hosi aldeia Daitete, Riti-udu no Ma-hui ho totál populasaun 775 no uma-kain 218. Ponte ne’e m’os fasilita komunidade suku Manapa, postu administrativu Cailaco.

“Ami-nia tékniku sira halo supervizaun iha terrenu relata mai katak obra ne’e to’o ona 90%, agora serbisu besik finaliza ona, lakleur tán bele tau ona aspál,” Diretór Obra Públika Munisípiu Bobonaro, António Mahana Soares, informa ba Agência TATOLI, iha nia knaar-fatin, Holsa, Maliana, sesta ne’e.

Nia haktuir, durante implementasaun projetu hahú iha 2018 la’o ho di’ak, maibé iha 2019 to’o 2020 serbisu balu labele realiza tanba impaktu hosi pandemia Covid-19, ne’ebé limita traballadór sira atu aselera projetu ne’e tuir kontratu serbisu.

Projetu ne’e rasik hetan extensaun hosi governu hahú hosi janeiru 2021 to’o juñu, maibé la konsege finaliza no governu deside extende ba fulan-neen tán.

“Ponte ne’e tuir loloos hotu tiha ona tanba ninia rangka baja mai tinan ida tiha ona, maibé tanba Covid-19 entaun peritu sira hosi estranjeiru sira labele mai monta, foin lalais iha semana rua ba kotuk mak primeiru-ministru halo karta autorizasaun sira tama mai, agora monta besik hotu ona,” nia esplika.

Iha fatin ketak, Enjeñeiru Kompañia Nananyo Join Venture Adam Motor, Lazaro Olandino dos Reis,  hateten, daudaun ne’e aselera hela serbisu molok udan monu-rai bele finaliza ona.

“Posiblidade fulan-dezembru ne’e ita konklui ona projetu ne’e, tanba ne’e mak seidauk udan ami bók lalais, nune’e bainhira udan mai ne’e serbisu importante sira ita remata ona, ne’e duni ami garante la to’o tinan oin hotu ona,” nia promete.

Xefe suku Ritabou, Maximiano dos Santos Araújo, kontente ho rezultadu projetu ne’e tanba bele fasilita ona komunidade sira bele movimenta ba-mai.

“Iha tinan hirak liubá ponte ne’e kotu, ita-nia komunidade sira parte koléjiu hetan dezastre balu mate, balu lakon tanba mota lori na’in-ualu, iha tempu sira udan monu-rai. Ne’e duni ho ponte foun ne’e ami agradese tanba bele responde ona komunidade sira-nia preokupasaun,” nia agradese.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here