Prezidente Autoridade RAEOA, Arsénio Paixão Bano, hala'o lansamentu ba projetu rekonstrusaun Gabiaun iha suku Usitasa'e. Imajen/mídia ZEESM.

OÉ-CUSSE, 22 outubru 2021 (TATOLI)— Projetu rekonstrusaun Gabiaun ne’ebé lokaliza iha aldeia Buqui, suku Usitasa’e, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA) gasta $129,084.67.

Projetu rekonstrusaun Gabiaun ne’e, ezekuta hosi empreza Erihjocia Unipesoál Lda, ho valór kontratu $129,084.67, distánsia metru 400 ho durasaun kontratu durante loron 120.

Nune’e iha kinta (21/10) ne’e, Prezidente Arsénio Paixão Bano, akompaña hosi Sekretáriu Rejionál ba Asuntu Agrikultura, José Eta, Sekretáriu Rejionál Komérsiu no Indústria, Pedro da Cunha B. da Silva, hamutuk ho diresaun rejionál infraestrutura, halo ona lansamentu hodi proteje natar no to’os komunidade nian molok udan monu-rai.

“Ita espera to’o dezembru bele termina konstrusaun ne’e, tanba projetu sira-ne’e atu responde komunidade sira-nia preokupasaun bainhira akontese siklone tropikál serojoa afeita sira-nia área produtivu sira,” Arsénio Paixão Bano, informa ba Agência TATOLI iha Oé-Cusse, sesta ne’e.

Autoridade RAEOA estabelese projetu hamutuk unidade-20 ho objetivu atu halo rekuperasaun relasiona ho akontesementu dezastre siklone tropikál seroja ne’ebé akontese iha 4 abríl liubá.

Projetu ne’e sei proteje área produtivu hamutuk ektare 22.25 envolve benefisiáriu uma-kain 72 no atu rekupera ekonomia komunidade Hau-Ana. Projetu Gabiaun ne’e mós envolve traballladór hamutuk kuaze ema na’in 40.

Xefe suku Usitasa’e, Tomás Ulan Colo, agradese ba Autoridade RAEOA, tanba tinan ne’e suku refere hetan projetu Gabiaun unidade rua inklui projetu edukasaun konstrui konstrusaun eskola foun unidade rua nomoos aplika tara bandu ba bee-matan Beun-Sila.

Notísia relevante: Autoridade RAEOA aloka millaun $2-resin ba rekonstrusaun gabiaun

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here