Inan-feto sira partisipa komemorasaun loron mundiál feto rurál iha postu administrativu Tutuala, Lautém. Imajen/ Natalino Costa.

LAUTÉM, 22 outubru 2021(TATOLI)— Prezidente Repúblika, Francisco Guterres, husu ba Governu atu hakbiit feto iha área rurál sai ajente transformadór iha família no sosiedade.

Xefe Estadu hato’o mos mensajen kongratulasaun ba feto rurál sira iha territóriu Timor-Leste, iha ámbitu komemorasaun  loron internasionál feto rurál 2021 ho tema “Dezenvolve feto rurál atu asegura aihan ba ema hotu”.

“Ha’u hakarak hato’o kongratulasaun no hakuak bo’ot ba feto rurál sira no labele marzinaliza feto sira.  Ha’u husu ba mane sira ita tenke sai parseiru di’ak no tenke sai lideransa iha ita nia família,” Xefe Kasa Sivíl Prezidénsia Repúblika, Francisco Maria de Vasconcelos, hato’o mensajen Xefe Estadu ba komunidade iha postu Tutuala, Lautém, sesta  ne’e.

Xefe Estadu mós husu ba Governu buka habiit feto rurál liuhosi meiu empreendedorizmu atu sai ajente transformadór iha familia no sosiadade.

“Ita konsidera feto nuudar ajente transformadór iha família no sosiadade. Ita tenke apresia ba kapasidade feto nian no ita tenke so’e uzu kustumu la apresia ema, satán la apresia feto,” nia afirma. 

Iha biban hanesan, Sekretária Estadu Igualdade no Inkluzaun (SEII), Maria José da Fonseca Monteiro de Jesus, informa Governu iha kompromisu liuhosi SEII buka no hakbi’it nafatin feto sira iha área rurál liuhosi programa asesu kréditu movél atu hafora sira atividade empreendedorizmu.

“Ha’u apresia maluk feto sira hahú partisipa ativu iha vida ekonómiku sira no ita sei buka hodi mellora liu tan,” Sekretária Estadu ne’e kompromete.

Prezidente Grupu Muller Parlamentar Timor-Leste (sigla portugués, GMPTL), Lidia Norberta, apresia feto nian partisipa durante ne’e iha área ekonomia, polítika, sosiál no seluk tan.

“Ha’u orgullu ba ita nian maluk feto sira tanba hahú muda sira nian an hodi envolve atividade iha família no sosiadade, maski balun sei halo servisu todan hala’o serbisu uma laran,” Deputada ne’e akresenta.

Nune’e mós, Prezidente Rede Feto Timor-Leste, Zelia Fernandes, mós kongratula feto rurál, iha ámbitu komemorasaun feto rurál ho tema “ Dezenvolve feto área rurál atu asegura aihan ba ema hotu”.

“Ami promete sei fó akompamentu nafatin ba feto ruràl sira hodi defende no proteje inklui hakbiit feto liuhosi kuálker área, nune’e feto  sai forte liután família no sosiadade,” nia promote.

Entretantu, Administradór Munisípiu Lautém, Domigos Savio, sente kontente no agardese ba Governu  tanba deside tinan ne’e komemora loron mudiál feto rurál iha postu administrativu Tutuala, munisípiu Lautem.

Iha eventu ne’e, Xefe Casa Sivíl entrega mós livru diskursu Prezidente Repúblika, Francisco Guterres Lú-Olo, iha mandatu tinan haat ba Administradór Postu Tutuala no Xefe SukuTutuala.

Jornalista            : Natalino Costa

Editór                    : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here