Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, akompaña hosi Sekretáriu Estadu Arte no Kultura, Teófilo Caldas, entrega sertifikadu vasina ba abitante suku Liurai hadoin simu vasina, iha sentru saúde, suku Liurai. Imajen/MAPKOMS

DILI, 22 outubru 2021 (TATOLI)-Ministériu Asuntu Parlamentár no Komunikasaun Sosiál (MAPKOMS), akompaña hosi Sekretaria Estadu Arte no Kultura (SEAK), foin lalais ne’e divulga importánsia kampaña vasinasaun kontra COVID-19 ba komunidade aldeia Rai-Rema no Rai-Mansu iha suku Liurai, postu administrativu Aileu villa, munisípiu Aileu.

Iha abertura atividade ne’e, Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, konvida komunidade sira atu hakbesik-an ba sentru saúde hodi simu vasina, nune’e bele hasa’e imunidade atu satan kontájia COVID-19.

“Moras COVID-19 nu’udar moras ne’ebé sai ameasa boot ba ema hotu iha mundu, pesti ne’e rasik labele haree ho matan, nune’e husu ba komunidade simu vasina hodi bele iha imunidade, nune’e hala’o filafali atividade sira ho normál no livre hanesan iha área negósiu, eskola, kultura no seluk tan,” Ministru Francisco hateten ba komunidade iha suku Liurai, hanesan haktuir iha nota ne’ebé Agência TATOLI asesu, sesta ne’e.

Governante ne’e dehan, antes ne’e iha nasaun barak mak la fiar vasina, maibé to’o ikus sira arrepende tanba populasaun barak mak lakon vida, nune’e membru Governu sira marka prezensa iha komunidade nia le’et hodi halo esplikasaun ho loloos relasiona ho vantajen vasina.

Bazeia ba dadus atualizadu hosi sistema saúde, iha munisípiu Aileu, abitante ne’ebé simu ona vasina doze dahuluk hamutuk 19.106 (61,2%) no ema ne’ebé simu ona vasina doze daruak hamutuk 7.513 (24,1%), ne’ebé hanesan munisípiu ho taxa vasinasaun kiik liu daneen hosi munisípiu hotu.  

“Hanesan governante iha obrigasaun morál atu mai ko’alia no rona ita-boot sira, tanba vasina ne’e programa nasionál Governu nian, ne’ebé importante tebes hodi fó protesaun ba povu nia saúde,” nia esklarese.

Iha fatin hanesan, Sekretáriu Estadu Arte no Kultura, Teófilo Caldas, hateten, Governu nunka hanoin atu estraga povu nia saúde, maibé hakarak proteje povu hosi moras COVID-19.

“Tanba ne’e, husu ita atu kolabora simu vasinasaun, tanba dalan úniku atu prevene-an hosi vírus ne’e maka simu vasina,” governante ne’e enkoraja

Iha atividade ne’e marka prezensa hosi Administradór postu administrativu Aileu villa, Diretór Saúde munisípiu Aileu, kargu xefia balun iha MAPKOMS no SEAK, líder komunitáriu, pesoál saúde no hetan partisipasaun másimu hosi komunidade lokál.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here