Atividade sosializasaun matadalan auditoria sosiál no polítika empréstimu ba komunidade iha suku Ossu de Cima, sesta (22/10). Imajen TATOLI/Vitorino Lopes da Costa

VIQUEQUE, 22 outubru 2021 (TATOLI)–Organizasaun Naun Govermentál (ONG) Luta Hamutuk halo sosializasaun kona-ba matadalan auditoria sosiál no polítika empréstimu ba komunidade iha suku Ossu de Cima, postu adiministrativu Ossu, munisípiu Viqueque, durante loron-haat.

“Durante tinan 16 nia laran, ami-nia organizasaun foku hala’o atividade monitorizasaun no advokasia ba projetu infrastrutura bázika hanesan edukasaun, saúde, bee-moos, eletrisidade no estrada rurál, tanba sosiedade sivil hanesan parseiru ida hosi Govemu hodi fó apoiu tomak ba prosesu dezenvolvimentu ne’ebe Ia’o iha rai laran, atu nune’e dezenvolvimentu ne’e bele fó benefísiu ba komunidade,” Reprezentante Luta Hamutuk, Augusto Ruas Monteiro, hateten ba Agência TATOLI, iha suku Ossu de Cima, sesta ne’e.

Luta Hamutuk nu’udar ONG ida iha Timor Leste ne’ebé eziste desde tinan 2005, harii hosi ativista timor-oan na’in-hitu, ho vizaun organizasaun ne’e mak estabelesimentu ‘Ukun Rasik-an’ (self determination) iha Repúblika Demokrtika de Timor Leste (RDTL), hanesan manifesta kompromisu nasionál ba justisa ekonomia no partisipasaun públika, inklui respeita no valoriza demokrasia, igualdade no transparánsia.

Luta Hamutuk hahú hetan konfiansa hosi Gabinete Apoiu Sosiedade Sivil (GASC, sigla portugés) hosi Gabinete Primeiru Ministru (GPM), hodi hala’o programa auditoria sosiál ba estrada dirasaun Baucau-Viqueque, ne’ebé envolva monitorizasaun lokál no verifikasaun dadus hosi komunidade kona-ba konstrusaun estrada durante fulan-neen.

“Atu termina programa ne’e, Luta Hamutuk kontinua hala’o atividade sosializasaun mata dalan auditoria sosiál no polítika empréstimu iha nível suku inklui rezultadu serbisu auditoria sosiál,” nia akresenta.

Objetivu atividade ne’e realiza iha nível suku hodi autoridade lokál, líder komunitáriu no komunidade lokál bele iha koñesimentu, liuhosi fahe rezultadu auditoria sosiál ne’ebé monitorizasaun lokál halo ona.

“Ita diskute hamutuk rezultadu auditoria sosiál hosi entidade hotu hodi hamosu rekomendasaun hamutuk ba rezultadu, fahe responsabilidade ba malu no hametin konfiansa hodi kontinua tau-matan ba servisu públiku sira,” nia subliña.

Iha fatin hanesan, Xefe suku Ossu de Cima, Celestino Moteiro de Gama, hateten, iha kompañia xineza ida no kompañia lokál Uacae mak responsável ba konstrusaun estrada Baucau-Viqueque.

“Ohin ami bele hetan informasaun balun hosi Ministériu Obra Públika (MOP), katak iha konstrusaun ne’e kompañia halerik ba materiál lokál, tanba ne’e Governu presiza koordena ho Autoridade Nasionál Petróleu no Minerál (ANPM) atu autoriza materiál lokál hodi kompañia bele uza ba konstrusaun estrada,” líder komunitáriu ne’e dehan.

Nune’e, nia husu ba kompañia hodi garante kualidade estrada, hodi bele uza ba tempu naruk.

Iha biban hanesan, Diretór Servisu Obra Públika Viqueque, Mário do Rego, haktuir, durante halo avaliasaun ba estrada sira, identifika katak kompañia sira tarde ezekuta obra tanba kestaun klima no situasaun pandemia.

Atividade ne’e partisipa hosi líder komunitáriu, Diretór Servisu munisipál, autoridade seguransa, veteranu, traballadór, komunidade, afetadu projetu kontrusaun no ema ho defisiénsia.

Jornalista : Vitorino Lopes da Costa

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here