Estudante Eskola Téknika Vokasionál Zumalai simu Vise-MEJD António Guterres ho kahe tais. Imajen Tatoli/Celestina Teles.

COVALIMA, 22 outubru 2021 (TATOLI)—Diretór Servisu Saúde Munisípiu Covalima, Filipe Pereira Lemos, informa iha postu administrativu Zumalai, munisípiu Covalima, komunidade falta 21,4% mak seidauk simu vasina no 78,6% mak simu ona vasina.

Notísia Relevante: Covalima okupa fatin dahuluk progresu vasinasaun atinje 82,4%

“Iha Zumalai, jeográfikamente defisil tebes ba pesoál saúde sira atu kobre. Maibé, ho esforsu hosi parte hotu, ohin loron, ita-nia taxa kobertura vasinasaun iha Zumalai atinje ona 78,6% no ita sei falta 21,4% mak seidauk vasina. Ita kompara ho postu administrativu sira seluk, Zumalai mak sei kiik liu,” Filipe Pereira Lemos hateten ba komunidade liuhosi nia diskursu, iha Eskola Téknika Vokasionál Zumalai, sesta ne’e. 

Taxa kobertura vasinasaun atinje ona 78,6% tanba esfosu hosi líder komunitária sira hamutuk ho entidade sira hotu no komunidade mós iha konsiénsia hakat ba sentru vasinasaun hodi simu vasina, hafoin rona tiha informasaun kona-ba importánsia hosi vasina hosi membru Governu sira.

“Ita no autoridade lokál fahe nafatin informasaun ba ita-nia sidadaun sira-ne’ebè mak seidauk vasina ne’e (21,4%), bele hakat hakbesik ba sentru vasinasaun hodi simu vasina, nune’e bele livre hosi moras COVID-19,” nia dehan. 

Tuir dadus hosi Servisu Saúde Munisípiu Covalima hatudu katak, taxa kobertura vasinasaun iha munisípiu Covalima ho postu administrativu hitu ne’e, postu administrativu Zumalai mak taxa kobertuura kiik liu kompara ho postu sira seluk. 

“Taxa kobertura vansinasaun postu administrativu Fatumea 99%, Fatululik 100%, Tilomar ho Maucatar 90%, Suai Vila 80% no Zumalai foin 78%,” nia dehan. 

Notísia Relevante: Vise-MEJD ensera kampaña vasinasaun iha Zumalai

Jornalista : Celestina Teles

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here