iklan

BOBONARO, COVID-19, HEADLINE, MUNISÍPIU, SAÚDE

Komunidade Ritabou 2.451 seidauk simu Vasina

Komunidade Ritabou 2.451 seidauk simu Vasina

Xefe suku Ritabou, Maximiano dos Santos Araújo. Imajen Agência TATOLO /Sérgio da Cruz.

BOBONARO,21 outubru 2021 (TATOLI)— Komunidade suku Ritabou, postu administrativu Maliana, munisípiu Bobonaro hamutuk 2.451 mak seidauk simu vasina.

“Ita-nia populasaun alvu ne’e 3.913, sei falta 2.451 mak seidauk vasina, no sira-ne’ebé simu ona ne’e doze haduluk 1.452 no kompleta doze hamutuk 523, maibé balu foin lais Ministru Fidelis mai kampaña vasinasaun ne’e ami seidauk hetan dadus hosi saude,” Xefe suku Ritabou, Maximiano dos Santos Araújo informa ba Agência TATOLI, iha sede suku, sesta ne’e.

Haree ba númeru tarjetu ne’ebe seidauk atinje alvu, líder komunitária ne’e sei buka meiu koopera ho parte saude kontinua halo sensibilizasaun kle’an kona-ba importánsia hosi vasina, nune’e konsiensializa komunidade sira partisipa másimu iha programa vasinasaun.

Nia dehan, estadu laiha hanoin atu estraga ninia povu rasik, tanba nasaun ne’e iha povu mak nasaun hamriik.

“Ha’u orienta xefe aldeia no delegadu sira atu nafatin enkoraja ita-nia komunidade sira simu vasina, atubele proteje-aan hosi transmisaun covid-19,” nia katak.

Dadus hosi Ministériu Saúde fó-sai katak, populasaun munisípiu Bobonaro hosi idade 18 ba leten ho komorbilidade ne’ebé atu simu vasina hamutuk 56,744. Hosi númeru ne’e 54.1% simu ona doze dahuluk no kompleta doze 29,9%, nune’e Bobonaro sei okupa terseiru lugár persentajen vasinasaun kiikliu kompara ho munisípiu hirak seluk.

Jornalista         : Sérgio da Cruz

Editór               : Evaristo Soares Martins

iklan
iklan

Leave a Reply

iklan
error: Content is protected !!