DILI, 22 outubru tinan 2021 (TATOLI)—VIII Governu konstitusionál ne’ebé lideradu hosi Primeiru-Ministru, Taur Matan Ruak, kinta (21 outubru) ne’e inaugura Uma Kbiit Laek tolu ba benefisiáriu uma kain tolu iha suku Tohumeta, postu administrativu Laulara, Munisípiu Aileu.
Ministru Administrasaun Estatál, Miguel de Carvalho, reprezenta Primeiru-Ministru inaugura Uma Kbiit Laek ne’ebé akompañadu hosi Administradór Munisípiu Aileu Abel da Conceição, Diretora Jerál PNDS ho nia komitiva.
“Objetivu hosi VIII Governu Konstitusionál nia polítika mak povu tenke moris di’ak. Parte ida hosi moris di’ak mak tenke hela iha uma seguru no dignu. Tanba ne’e, VIII Governu hahú ho tau matan ba sidadaun sira-ne’ebé vulneravél liu ba hela fatin hodi harii uma ba sira,” Ministru Administrasaun Estatál, Miguel de Carvalho, hateten liuhosi komunikadu imprensa ne’ebé Agência Tatoli asesu, sesta ne’e.
Governu konstrui “Uma Kbiit Laek” ne’e, ho objetivu atu bele tulun hakmaan família kbiit la’ek sira ba uma mahon ida seguru no dignu, hodi kumpre Konstituisaun RDTL artigu 58 (Hela-Fatin) ne’ebé hateten, “Ema hotu iha direitu ba nia an no nia família atu iha uma ida ho dimensaun no kondisaun di’ak, moos no konfortu atu bele iha intimidade ba ema ida-idak no privasidade familiár no uma mós sai hanesan nesesidade bázika tuir kategoria nesesidade ema nian”.
Xefe Suku Tohumeta, Manuel Soares, hodi benefisiáriu nia naran hato’o sentimentu ksolok ba VIII Governu Konstitusionál ne’ebe mai ho politika di’ak harii uma ba família kbiit laek sira liuhosi Programa Nasionál Dezenvolvimentu Suku (PNDS).
“Ha’u husu atu kontinua polítika ida-ne’e, tanba sei iha família barak mak kondisaun uma sei aat no presiza Governu nia tulun,” nia dehan.
Ba munisípiu Aileu, Uma Kbiit Laek etapa dahuluk tinan 2021 hamutuk uma 99 no faze tuir mai sei kontinua iha tinan 2022 ne’ebé hatama ona ba proposta OJE 2022 nian.
Entretantu, tuir relatóriu Sensu 2015 nian, iha uma rihun 200 mak kondisaun la di’ak iha teritóriu tomak.
Despeza Jerál 2022
Administrasaun Munisipál Aileu iha 2022 hetan alokasaun orsamentu hamutuk tokon $2.8. Orsamentu hirak ne’e aloka tuir liña orsamentu servisu sektorál no sekretariadu munisipál nian.
Husi totál orsamentu akumuladu ona kustu ba merenda eskolár, alfabetizasaun, konsensaun eskolár rihun $937.1 no ba projetu re-apropriasaun Planu Dezenvolvimentu Intergradu Munisipál (PDIM) rihun $473.5.
Munisipiu Aileu hetan alokasaun orsamentu hosi Programa Nasionál Dezenvolvimentu Suku (PNDS) hamutuk rihun $532.
Hosi total ne’e, atu finansia ba atividade fíziku sira hamutuk rihun $458.2 ba suku 15 no restu rihun $73.8 ba kustu operasionál ba suku sira iha Aileu.
Nune’e mós, Administrasaun Munisipál Aileu hetan alokasaun orsamentu hosi programa Uma Kbiit Laek (UKL) hamutuk rihun $848, iha Orsamentu Jeral Estadu 2022.
Hosi total aloka rihun $816 ba konstrusaun uma ba komunidade kbiit laek iha suku 16, no kustu operasionál rihun $32 sei aloka iha Administrasaun Munisipál Aileu.
Administrasaun Munisipál Aileu lokalizadu iha parte sul Dili, kapital país, hatudu pozisaun jeográfika munisipiu Aileu ne’ebé ho luan kilómetru 729 ho populasaun ema na’in-44,325. Administrasaun Munisipál Aileu iha postu administrativu haat (4), suku 31 no aldeia 139.
Jornalista : Nelia Fernandes
Editór : Cancio Ximenes
