Arsebispu Arkidioseze Metropolitana Dili, Dom Virgílio do Carmo da Silva, SDB, fó ordenasaun ba Diákonu na’in-haat (4) sai Nai Lulik iha festa São João Paulo II, iha Igreja Imaculada da Conceição Katedrál Dili, sesta (22/10). Imajen TATOLI/Egas Cristóvão.

DILI, 22 outubru 2021 (TATOLI)—Arsebispu Arkidioseze Metropolitana Dili, Don Virgílio do Carmo da Silva, SDB, hateten katak sai padre ne’e hanesan vokasaun ida, ne’ebé Nai Maromak bolu atu hola parte hodi hala’o misaun Maromak nian.

“Ba amu na’in-haat, Maromak bolu ona sira atu la’o tuir dalan ida-ne’e. Maromak bolu sira, sira mós tenke hakas an atu koolabora nafatin ho Maromak hahú hosi tempu formasaun sira kolabora ona ho Maromak to’o mai iha momentu ne’e sai padre, mak foin hahú sira-nia misaun. Sai padre ne’e hanesan vokasaun ida, ne’ebé Nai Maromak bolu atu hola parte hodi hala’o misaun Maromak nian,” Don Virgílio do Carmo da Silva, hateten ba jornalista sira hafoin ramata misa ordenasaun saserdotál ba diakonu na’in-haat sai saserdote iha Igreja Imaculada da Conceição Katedrál Dili, sesta ne’e.

Ho ordenasaun ne’e, ba oin, amu lulik na’in-haat ne’e sei hahú sira-nia misaun nu’udar saserdósiu, moris tuir sira-nia lema ‘Maromak ne’ebé haruka atu ba haklaken’ katak fó sasin no atu haklaken Maromak nia liafuan ba sarani sira.

“Sira-nia vida orasaun, sira-nia obidiénsia no sira rona Maromak nia liafuan, ho hirak ne’e mak ajuda sira atu nafatin hamriik metin hodi hatán ba Maromak nia bolu,” Don Virgílio hateten.

Amu lulik foun, Florindo de Jesus, sente haksolok ho loron ida-ne’e tanba ho Maromak Nia grasa no ema hotu nia orasaun mak lori nia no ohin bele sai Nai Lulik.

“Ba ami Nai Lulik foun sira, ba loron ida ohin, ami sente haksolok tanba ami hatene katak ami ema baibain, ema fraku no ema-ne’ebé mak iha frakeza barak, ami la soi ba knaar Nai Lulik nian. Maibé ho Maromak nia grasa, ema hotu nia orasaun no ho ami-nia kolaborasaun, ikus mai Maromak bolu ami hodi ba iha dalan ida-ne’e,” nia dehan.

Tanba ordenasaun Saserdotál ida-ne’e katak ‘Don’ no ‘Don’ ida-ne’ebé Maromak haraik mai ka proposta ida-ne’ebé Maromak propoin ba ema hotu-hotu atu fó resposta.

Maibé, ema barak simu konvite ne’e la’os katak hotu-hotu tenke bá, maibé hanesan Jesus dehan ‘Bolu barak maibé hili uitoan’.

“Tanba ne’e ami agradese, maske Maromak bolu ona ami, ami ema nafatin no ami husu ita hotu-hotu atu reza nafatin mai ami. Nune’e, dalan ne’ebé ami hili ona, ami bele prontu nafatin hodi servi ba uma kreda atu bele tulun no lori sarani sira ba Maromak no lori Maromak nia grasa ba ema hotu,” nia hateten.

Reprezentante família Nai Lulik foun, Rosa Pereira, sente kontente no agradese ba Maromak tanba hanesan sarani ida entrega nia oan mane ida ba Maromak atu servi uma kreda.

“Nu’udar inan, ha’u sente dalan ida-ne’e di’ak tebe-tebes ba ita ema sarani, nune’e ha’u bele entrega ha’u-nia oan ida nu’udar bibi atan Maromak nian. Ha’u sente kontente tebe-tebes,,” nia dehan.

Diákonu Diosezana na’n-haat (4) ne’ebé simu ordenasan Saserdotál iha Festa São João Paulo II ne’e mak Hélio da Costa Nunes hosi Parókia Nossa Senhora Imaculada da Conceição Maubisse, Inocênciao Barreto Lopes hosi Parókia Maubisse, Carlos Miguel Pereira Ruben hosi Parókia Sagrado Coração de Jesus Becora no Florindo de Jesus hosi Parókia São Pedro no São Paulo Aileu.

Jornalista  : Nelia Fernandes

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here