Diretór Nasionál Transporte Marítima, Lino Barreto. Imajen TATOLI/Antónia Gusmão

DILI, 22 outubru 2022 (TATOLI)–Diretór Nasionál Transporte Marítima (DNTM), Lino Barreto, hateten, relasiona ho laiha ró ne’ebé bele asegura ligasaun marítima Dili-Oé-cusse no Dili-Ataúro, maka diresaun autoriza Ró Bintang Samudra 8 tula pasajeiru, maibé ba hirak ne’ebé halo servisu esensiál.

“Maski Diresaun Nasionál Transporte Marítima seidauk autoriza tula pasajeiru, maibé iha pedidu balun hosi empreza atu tula ema halo servisu esensiál ho karatér emerjénsia, ezemplu hanesan membru FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL), Ministériu Saúde inklui ministériu seluk, tanba servisu sira konsidera importante maka dala ruma ami autoriza,” Diretór ne’e hateten ba Agência TATOLI, iha ninia knaar fatin, Portu Dili, sesta ne’e.

Notísia relevante: AMTL preokupa kestaun seguransa Ró Bintang Samudra 8 tula pasajeiru

Tuir Diretór Nasionál Transporte Marítima, durante ne’e ró hosi Indonézia ne’e tula karga sasán hosi Dili bá Oé-cusse no Ataúro, ho akompañmentu hosi motorista no ajudante sira inklui pesoál ne’ebé presta servisu esensiál.

“To’o agora Diresaun ne’e seidauk autoriza tula ema, karik ema ruma iha ró laran ne’e tanba tula veíkulu, entaun tenke tula mós motorista no ajudante, ne’ebé dala ruma tula veíkulu kiik sira karik besik 40, entaun tenke tula mós responsável ba sasán, ne’ebé ema sira ne’e mak durante ne’e haree iha ró leten,” Lino Barreto esplika.

Diretór nasionál ne’e rekoñese, tanba ró ho tipu landing craft (LTC), maka laiha ekipamentu hanesan ró tula pasajeiru.

“Karik iha mós ba de’it tripulante no rezerva ba ema ne’ebé akompaña karga sasán,” nia akresenta.

Kapasidade Ró Bintang Samudra 8 atu tula karga hosi tonelada 800 to’o 1.000, hanesan veíkulu kiik 40 no boot 30.

Liga ho kestaun tula pasajeiru, Agência TATOLI tenta entrevista Diretór Ezekutivu Ró Ataúro Express, Lourenço de Oliveira, ne’ebé mak aluga Ró Bintang Samudra 8 hosi Indonézia, hodi husu konfirmasaun maibé rejeita fó komentáriu.

DNTM sei kolabora ho Ró Ataúro Express fasilita ligasaun Dili-Oé-cusse

Relasiona ho loron finadu ne’ebé besik ona, DNTM sei kolabora ho na’in ba Ró Ataúro Express hodi fasilita ligasaun via mátima Dili-Oé-cusse. 

“Ró ne’e kondisaun di’ak no bele tula pasajeiru, maibé tenke limita ema no karga. Maski ró ho kondisaun di’ak no garante seguransa ba pasajeiru, maibé diresaun haree no tetu didi’ak tanba ró ne’e dokumentu inválidu. Maski labele autoriza tula ema, maibé iha situasaun apertadu balun, Diresaun Nasionál Transporte Marítima sujere Governu tenke foti desizaun, ne’ebé autorizasaun hosi diresaun ho akompañamentu ho pareser ruma,” Diretór Nasionál Transporte Marítima, Lino Barreto, dehan.

Tuir Lino Barreto, Ró Ataúro Express hanesan ró pasajeiru, ne’ebé parte diresaun sei kolabora ho responsável ró hodi fasilita pasajeiru.

“Ami sei bolu ró na’in  hodi koordena atu ró bele fasilita tula pasajeiru,” nia tenik.

Aleinde ne’e, durante sosializasaun prevensaun no mitigasaun COVID-19, membru Governu sira aluga Ró Ataúro Express hodi fasilita deslokasaun ba Dili-Oé-cusse.

“Ró Ataúro Express bele tula pajeiru 100-resin, maibé bele redús pasajeiru ka labele tula karga, tula de’it ema,” nia subliña.

Kona-ba dokumentu inválidu, DNTM to’o agora seidauk simu informasaun ruma hosi na’in ba ró.

Antes ne’e, Ministru Transporte no Komunikasaun, José Agostinho da Silva, hateten, situasaun pandemia afeta tebes ba kondisaun atu lori Ró Belin Nakroma halo manutensaun iha Surabaya, Indonézia, ne’ebé manutensaun ikus iha juñu 2020 ho kustu $226.000 no to’o agora tempu ona halo manutensaun maibé seidauk bele realiza.      

Enkuantu, tuir International Convention for the Safety of Life at Sea (SOLAS), obrigatóriamente ró sira ne’ebé halo operasaun komersiál iha tasi-laran anuálmente tenke halo manutesaun hodi garante no asegura vida pasajeiru sira.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here