Xefe suku Lontas, postu administrativu Lolotoe, munisípiu Bobonaro. Imajen Agência TATOLI/Sérgio da Cruz.

BOBONARO,21 outubro 2021 (TATOLI)—  Abitante hamutuk 309 iha suku Lontas, postu administrativu Lolotoe, munisípiu Bobonaro, laiha kbiit atu dada bee-moos tanba bee-matan dook tebes hosi hela fatin tanba nehusu Governu prioritize iha Orsamentu Jerál Estadu (OJE) 2022.

Abitante 309 ne’e hosi aldeia Tas-Mil, suku Lontas, postu administrativu Lolotoe, munisípiu Bobonaro no komunidade aldeia refere ho totál uma-kain 75.

Xefe suku Lontas, postu administrativu Lolotoe, munisípiu Bobonaro, Alipio Bello, informa hahú kedas tempu okupasaun Indonézia até Timor-leste restaura nia independénsia ba-dala 19 ona komunidade aldeia Tas-Mil totál uma-ka’in 75 seidauk asesu bee-moos.

“Ha’u-nia komunidade ne’e iha aldeia tolu de’it, maibé só uniku aldeia Tas-Mil ho totál abitante 309 dezde tempu Indonézia mai to’o ita ukun-an tinan barak ona mós la sente dezenvolvimentu tanba bee atu hemu mós susar la halimar, atu asesu bee-moos tenke la’o-ain kilómetru tolu-resin,” Xefe suku Lontas ne’e informa ba Agência TATOLI, iha Maliana, sesta ne’e.

Problema bee-moos halo komunidade sira preukupa bainhira iha tempu bailoron naruk, tanba débitu bee hosi bee-matan maran hotu, entaun defísil atu fornese ba komunidade sira.

Ekuantu durante ne’e iha tempu bailoron no udan monu-rai, komunidade sira depende liu bee-moos ne’ebé instala hosi militár Indonézia, liuhosi programa Abri Masuk Desa (AMD), maibé daudaun ne’e kondisaun besi sira-ne’e ferujin hotu ona, labele fornese bee ba  komunidade sira.

“Instalasaun sira tempu naruk ona, ne’ebe nia la funsiona hotu ona, entaun komunidade no ita-nia oan estudante sira atu hariis ba eskola, sira tenke la’o-ain ba mota kuaze kilómetru tolu-resin mak foin bele kuru bee-moos, uza ba te’in, hari’is no fase-roupa,” nia dehan.

Problema bee-moos ne’e la’ós iha nia mandatu mak hato’o proposta ba autoridade munisípiu no nasional, maibé hahú kedas iha xefe suku sesante nia tempu to’o agora seidauk hetan rezultadu pozitivu atu rezolve.

“Iha tinan 2018 ne’e mak liuhosi PDIM (Programa Dezenvolvimentu Integradu Munisipál) kona-ba bee-moos, iha momentu ne’e aprovadu, ha’u rasik mai haree iha administrasaun munisípiu katak ha’u-nia aldeia iha priporidade númeru 1 iha Lolotoe atu asesu bee-moos, maibé realidade ikus sira kansela fali maibé razaun ha’u lahatene, osan mak la to’o ka ha’u-nia komunidade mak la merese atu hetan, ida-ne’e mak ha’u konfuzu,” nia haktuir.

Enkuantu daudaun ne’e, líder komunitáriu no komunidade sira identifika ona bee-matan ida iha Ilculba, aldeia Tas-Mil, maibé distánsia hosi área ne’e mai Tas-Mil kuaze kilómetru lima-resin, tanba ne’e komunidade sira laiha kbiit atu halo kontribuisaun hodi dada bee ba sira-nia aldeia.

Tanba ne’e husu ba Governu atu konsidera preokupasaun hirak-ne’e tau iha Orsamentu Jerál Estadu (OJE) 2022 nune’e bele fó solusaun ba preokupasaun komunidade aldeia refere. Totál populasaun iha suku Lontas hamutuk 879 ho totál uma-kain 189.

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here