Komunidade iha aldeia 05, suku Fatuhada, postu administrativu Don Aleixo, munisipiu Dili. Imajen Tatoli/Nelia Fernandes.

DILI, 21 outubru 2021 (TATOLI)—Vise-Primeiru-Ministru no Ministru Planu no Ordernamentu, José Maria dos Reis, enkoraja komunidade iha aldeia 05, suku Fatuhada, postu administrativu Don Aleixo, munisipiu Dili, atu partisipa másimu iha kampaña nasionál vasinasaun hodi prevene moras COVID-19 no bele hasa’e persentajen vasinasaun.

“Atividade ne’e hanesan kontinuasaun membru Governu sira tun ba baze atu fó apoiu ba autoridade lokál sira atu bele hasa’e peresentajen vasinasaun. Maske Dili ita hatene katak peresentajen boot ona, maibé presiza hasa’e tán to’o 100%,” José Maria dos Reis hateten ba Agência Tatoli, iha kampaña vasinasaun ne’ebé hala’o iha suku Fatuhada, kinta ne’e.

Maske vasinasaun daudaun ne’e la’o hela maibé presiza harii ekipa movél iha suku hotu-hotu, atu la’o tuir uma kain ida to’o uma kain seluk, nune’e ba komunidade ne’ebé labele ba sentru vasina bele hetan vasina direta iha sira-nia uma.

Vise Primeiru-Ministru ne’e apela ba komunidade atu partisipa másimu iha Programa Kampaña Nasionál Vasinasaun, nune’e bele kombate moras COVID-19 iha Timor-Leste.

“Ha’u apela nafatin ba hotu-hotu prinsipálmente iha Dili atu bele partisipa iha prosesu vasinasaun ida-ne’e, nune’e ita bele hametin liután ita-nia saúde, ema idak-idak nia saúde, hametin saúde familia no hametin saúde komunidade tomak iha Timor-Leste,” Governante ne’e hateten.

Diretora Saúde Munisípiu Dili, Agostinha Segurado, hateten objetivu programa kampaña nasionál vasinasaun COVID-19 atu lori besik liután informasaun ba komunidade iha aldeia, tanba iha munisípiu Dili sei falta rihun 40-resin mak seidauk vasina.

“Tanba ne’e, ita-nia atividade ida-ne’e bolu Mobile Klínik kada aldeia, hodi halo vizita uma ba uma atu haforsa liután sensibilizasaun ba ema vulneravel, idozu no ba ema-ne’ebé ho moras, nune’e sira bele konvense sira-nia fiar atu bele hola desizaun ba simu vasina,” nia esplika.

Iha parte seluk, Xefe Suku Fatuhada, Postu Administrativu Don Aleixo, Munisípiu Díli, Marcelino Soares apresia ho inisiativa Governu nian hodi halo sensibilizasaun COVID-19 ba komunidade Don Aleixo.

“Ha’u sente orgullu ho programa Governu nian ida-ne’e, tanba liuhosi programa ne’e bele fó fiar no motiva liután komunidade bele partisipa iha vasinasaun ne’e,” nia dehan.

Iha kampaña refera, Vise Primeiru-Ministru no Ministru Planu no Ordernamentu, José Maria dos Reis, hamutuk ho Adjuntu Prezidente Autoridade Munisípiu Dili, António Moniz Calau no mós ho ekipa saúde halo vizita diretamente ba komunidade ne’ebé ho moras iha uma, nune’e sira bele vasina hodi prevene COVID-19.

Entretantu, tuir dadus Ministériu Saúde hatudu katak, ema ne’ebé simu ona vasina doze dahuluk iha Timor-Leste hamutuk 69,6% no ema simu ona vasina doze daruak 45,0%. Enkuantu, iha Munisípiu Díli, ema ne’ebé simu ona vasina doze dahuluk hamutuk 80,5% no simu ona vasina doze daruak hamutuk 72,0%.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here